«Jazǵy demalysqa shyqqan oqýshylardyń ata-analaryn lagerlerdiń jumys jasaýy men jazǵy demalystyń uıymdastyrylýy alańdatady. Bıyl balalarǵa arnalǵan jazǵy demalys qala syrtyndaǵy lagerlerde ótedi. «Arman» týrıstik-saýyqtyrý kesheni 900 balany qabyldaı alady, 750 orny bar «Borovıchok» saýyqtyrý lageri, 280 oryndy «Batyr» shatyrly lageri jáne 300 bala qabyldaı alatyn «Tulpar» lageri jaz aılarynda jumys isteıtin bolady», - dep Nur-Sultan qalalyq bilim basqarmasynyń basshysy Sholpan Qadyrova búgingi brıfıngte málimdedi.
Bul lagerlerde jetim balalar, ata-anasynyń qamqorlyǵynsyz qalǵan balalar, «qıyn» balalar men kóp balaly jáne az qamtylǵan otbasy balalary demala alady. Sonymen qatar, oqýshylar saraıynda jazǵy demalys akademııasy uıymdastyrylady. «Bıylǵy Halyqaralyq balalardy qorǵaý kúni
«Barlyǵy balalar úshin» degen uranmen ótedi. Josparlanǵan is-sharalarǵa #NS_balalarkuni_bilim heshtegi qoıylady. Meıram kúni ınstagram áleýmettik jelisinde balalar psıhologynyń, ishki ister organdary ókilderiniń, advokattardyń, bilim berý uıymdary men ÚEU ókilderiniń qatysýymen tikeleı efır uıymdastyrylady jáne ata-analar men balalar quqyqtyq kómek pen keńester ala alady», - dedi Sh.Qadyrova.
Sport mektebiniń ashylýy kúni júzik atý, bes tas, asyq atý, toǵyzqumalaq, láńgi tebý, kir tasyn kóterý, qazaq kúresi boıynsha jarystar men master-klastar uıymdastyrylady.
Balalar «Soqpaq-tropınka» týrıstik jolaǵynda kedergilerden ótip, «Eko ASAR»-ǵa qatysady. Sonymen qatar, qıyn jaǵdaıdaǵy balalardy qoldaý ortalyǵy men «SOS Astana balalar aýylynyń» tárbıelenýshileri úshin merekelik baǵdarlama uıymdastyrylady.
