Mektep dırektory Qymbat Bekbaýovanyń aıtýynsha, B.Haıdarov atyndaǵy mektep 1979 jyly salynǵan. Taýly óńir Baıanaýyldyń sýyq qysynda mektep ishi azynap turady eken. Esik-terezeleri, edenderi ábden eskirgen.
Al túbinde bir jaqsylyq keler dep yrymdaıtyn aýyl halqy bárine tózimdi. Muǵalimder de, oqýshylar da solaı, shydaıdy, shydap keledi bárine.
Sóz júzinde bári jaqsy, al, jóndelmegen mektepter qaıdan shyqty degen osy. Osy aýdanǵa 1979 jyldan beri qansha basshy, qazirgi kúni qansha ákim keldi-ketti, olardyń baıandamalarynda bári jarqyrap turar edi. Kelimdi-ketimdi ákimderdiń aýyl mektepterine janashyrlyq jasaı almaǵandary ókinishti.
Oblystyq bilim basqarmasy da jyl saıynǵy tamyz máslıhatynda bári keremet dep baıandama jasaıdy. Biraq basqarmanyń shalǵaıdaǵy aýyl mektepteriniń hal-jaǵdaıyn bilip, nazarǵa almaıtyny, aralamaıtyny baıqalady.
Kelesi Qanysh Sátbaev atyndaǵy aýyldyq aýmaqtaǵy Shadyra mektebine kelsek, ol da 1972 jyly salynǵan. Qazir 117 oqýshy bilim alýda. Edeni shirip, terezeleri tozǵan, syrtynan sýyq ótpesin, qar túspesin dep sellofan jyltyrymen qaptap qoıady eken.
Sultanmahmut Toraıǵyrov aýylyndaǵy mektep te eski, kúrdeli jóndeý kútýde. Shalǵaıdaǵy Jańajol aýylyndaǵy Máshhúr Júsip atyndaǵy mekteptiń jylý júıesine 47 jyl bolǵan, qazir qurylǵy ábden tozǵan. Aýyl balalary qystygúni mektepke kelip tońyp, úılerine baryp jylynady. Internet áli jete qoımapty.
Ultymyzdyń birtýar uldarynyń atyn alǵan mektepterdiń júdep-jadap, ábden tozyǵy jetip turǵany úlkendi-kishili basshylarǵa syn.
Ekinshi dúnıejúzilik soǵystaǵy erligi úshin «Dańq» ordeniniń I, II, III dárejeli tolyq kavaleri atanǵan Jańatilek aýylynda týǵan batyr Baqyt Haıdarovtyń týǵanyna byltyr 100 jyl toldy.
Al mektepterimizdiń túri anaý.
Endi nátıjeli is kútelik. Bıyl Baıanaýyl aýdanynda «Jumyspen qamtýdyń jol kartasy-2025 baǵdarlamasy» aıasynda 11 joba maquldanypty.
Aýdan ákiminiń orynbasary Anar Bádenovanyń aıtýynsha, quny 656 mln 593 myń teńge turatyn joba boıynsha, biz joǵaryda jazǵan aýyl mektepteri kúrdeli jóndeýden ótpek. Aýdandaǵy 20 mektepke ishki dárethanalar ornatý jumystary josparlanypty.
Pavlodar oblysy,
Baıanaýyl aýdany
