Onlaın formatta uıymdastyrylǵan basqosýǵa Jaratylystaný fakýltetiniń ǵalymdary men oqytýshylary uıytqy boldy. Otandyq týrızmdi damytýdyń tyń tetikteri men basym baǵyttary talqylanǵan jıynǵa Almaty qalalyq Týrızm basqarmasynyń mamandary men týrıstik uıymdardyń ókilderi jáne joǵary oqý oryndarynyń professor-oqytýshylary qatysyp, ózara pikir almasty.
Semınardy Geografııa jáne týrızm kafedrasynyń meńgerýshisi Shahıslam Laıshanov ashyp, júrgizip otyrdy. Sondaı-aq sharada Jaratylystaný fakýltetiniń dekany Qajymuqan Kishibaev sóz sóılep, kóterilip otyrǵan taqyryptyń mańyzdylyǵyna toqtaldy. Ol jergilikti týrızm mamandaryn daıarlaýdaǵy Qyzdar ýnıversıtetiniń róli men búginde osy tarapta atqarylyp jatqan jumystar týrasynda da atap ótti.
Sonymen qatar basqosý barysynda Almaty qalalyq Týrızm basqarmasy basshysynyń orynbasary Qalıbek Aqylbekov «Almaty qalasy men aglomerasııasynda týrızmdi damytý qadamdary», L.Gýmılev atyndaǵy Eýrazııa ulttyq ýnıversıtetiniń Fızıkalyq jáne ekonomıkalyq geografııa kafedrasynyń professory Ordanbek Mazbaev «Turaqty damý jáne týrızmniń máseleleri», Qazaq ulttyq qyzdar pedagogıkalyq ýnıversıtetiniń Bıologııa kafedrasynyń aǵa oqytýshysy Dámejan Sadyqova «Qazaqstandaǵy ekotýrızmdi damytý múmkindikteri» jáne Geografııa jáne týrızm kafedrasynyń aǵa oqytýshysy Aıjan Satybaldıev «Elimizde eko jáne etno týrızmdi damytýdyń mańyzy», M.H. Dýlatı atyndaǵy Taraz memlekettik ýnıversıtetiniń Ekologııa kafedrasynyń aǵa oqytýshysy Erjan Abıkbaev «Áýlıeata óńiriniń kıeli jerleri jáne onyń aımaqtyq týrızmdi damytýdaǵy róli», «Kompas» týrıstik kompanııasynyń menedjeri Toǵjan Amanqulqyzy «Ekotýrızmdi damytýdyń artyqshylyǵy men kemshilikteri», taqyryptarynda baıandama jasap, paıymdy oılarymen bólisti.
– Tabıǵatty saqtaı otyryp, týrızmdi damytý – el ekonomıkasyn turaqty tabysqa jeteleıdi. Ol úshin Qazaqstanda alǵysharttar jeterlik jáne múmkindikter mol. Týrızm salasyn qalaı damytatyndyǵymyz, osy resýrstardy qalaı utymdy paıdalanatyndyǵymyzben tyǵyz baılanysty bolmaq, – deıdi semınarǵa qatysýshylar.
