Qazir ǵana Astanadaǵy «Astana-Arena» sport kesheninde Eýropa lıgasy toptyq saıysy 2-týrynyń Qaraǵandynyń «Shahteri» men Izraıldiń Haıfa qalasynyń «Makkabıi» arasyndaǵy matchy aıaqtaldy. Kezdesý 2:2 esebimen teń aıaqtaldy. Bul týraly Egemennews.kz tilshisi habarlady.
Komandalar alańǵa myna quramda shyqty:
«Shahter» - Aleksandr Mokın, Evgenıı Tarasov, Aldın Djıdıch, Nıkola Vasılevıch, Sergeı Malyı, Aleksandr Sımchevıch, Gevorg Kazarıan, Roher Kanıas, Gedımınas Vıchıýs, Andreı Fınonchenko, Sergeı Hıjnıchenko.
«Makkabı» - Sharanov, Tvatha, Gabaı, Pılıavskıı, Raıo, Golasa, Sosalıch, Iаdın, Ndlový, Raııan, Abýhazıra.
Kenshiler ujymy oıyn bastalǵan sátten bastap birden onyń tizginin óz qoldaryna aldy. Olar alǵashqy 15 mınýtqa daıin qarsylastaryn óz alańdary mańyna qysyp ustap, tipti shabýyl týraly oılaýǵa da mursha bermedi. Biraq qaraǵandylyqtar bul basymdyqtan tıisti nátıje shyǵara almady. Olar osy ýaqyttarda 2-3 gol soǵatyndaı múmkindikterdi jiberip aldy.
Shamamen, taımnyń ortasyna qaraı qonaqtar bas kóterip, alań ıeleri qaqpasyna qaraı alǵashqy joryqtaryn uıymdastyrdy. Sol mezetterde olar berer ret qaqpaǵa shyn qaýip te tóndirip úlgerdi. Osy tusta olar birinshi ret buryshtama da berip kórdi. Degenmen, bul alma-kezek shabýyl sáti tym uzaqqa sozylǵan joq. Sodan keıin «Shahter» qaıtadan atqa qondy. Bizdiń jigitterdiń endigi qarqyndary tipti kúshti bola tústi. Sondaı shabýyldardyń birinde, 40-mınýtta komanda kapıtany Andreı Fınonchenko áýelep kelgen dopty baspen qatty uryp, dál mańdaıshanyń astynan qaqpaǵa túsirdi. Arada bar-joǵy 5 mınýt ótkennen keıin qaraǵandylyq Evgenıı Tarasov qaqpashymen betpe-bet kelgen sátin keremet paıdalanyp, taǵy bir goldy soǵyp ketti. Osydan keıin komandalar 2:0 degen eseppen úziliske shyqty.
О́kinishke oraı, qaraǵandylyqtar ekinshi taımnyń basynan qonaqtarǵa match tizginin berip qoıdy. Izraıldik fýtbolshylar bizdiń qaqpa mańynan shyqpaı qoıdy. Olardyń shabýyldary barǵan saıyn qaýipti bola tústi. Buǵan qonaqtar sapynda oıynshylar almasqany da aıtarlyqtaı serpin berdi. Sol mazasyz joryqtardyń birinde meımandar qaraǵandylyqtar qaqpasyna qarymta dop soǵyp úlgerdi.
Kenshiler budan keıin de qorǵanysqa kóbirek alańdady. Sol kezderde qonaqtar taǵy da gol soǵyp kete jazdady. Degenmen, sodan keıin bizdiń jigitter qaıta serpilgendeı boldy. Olar birneshe ret Sharanov qorǵaǵan qaqpa mańyna bardy. Biraq týra soqqy bolǵan joq. Munyń sońyn ala «Makkabı» taǵy shabýylǵa shyqty. Sonyń artynsha Gevorg Kazarıan qatty soqqy jasady. Onyń urǵan dobyn qonaqtar qaqpashysy áreń ustap qaldy.
67-mınýtta alańǵa Maqsat Baıjanov shyqty. Ol jaraqaty syr bere bastaǵan Evgenıı Tarasovty almastyrdy. Al alańdaǵy jaǵdaı kóp ózgergen joq. Ol burynǵysynsha qonaqtardyń kóbirek shabýyldaýymen, arasynda alań ıeleriniń dúrkireı alǵa umtylýymen jalǵasyp jatty. Alaıda, bul ýaqyttary qaraǵandylyqtar buryshtama urýdy kóbirek oryndady.
Oıynnyń 79-mınýtynda «Makkabı» aqyry esepti teńestirip te úlgerdi. Ony qonaqtar sapynan taǵy da alańǵa keıin qosylǵan oıynshysy saldy. Ol dopty sol qaptaldan kele jatyp, alystan uryp túsirdi. Qaqpanyń alys buryshyna baryp túsken dopqa Aleksandr Mokın jete almady.
Izraıldikter budan keıin de shabýylǵa shyǵýyn toqtatpady. Olardyń keıbir soqqylary tipti qaqpaǵa kirip te kete jazdady. Ásirese, negizgi ýaqyttyń sońǵy mınýttaryndaǵy shabýyl aıryqsha qaýipti kórindi.
Match qonaqtardyń oqtyn-oqtyn jasaǵan osyndaı shabýyldary ústinde aıaqtaldy.
Osylaısha Qazaqstan komandasy Eýropa lıgasyndaǵy óziniń eń alǵashqy upaıyn aldy. Álbette, 2:0 etip jeńip turyp, oıyndy teńge keltirý eptep kóńilge kirbiń túsiredi. Osynyń aldynda óz alańynda utylǵan ızraıldik komanda da osy matchta óziniń bıylǵy maýsymdaǵy alǵashqy upaıyna qol jetkizdi.
Endi qaraǵandylyqtar Gollandııanyń AZ komandasymen qatarynan eki oıyn ótkizedi. Onyń birinshisi Astanada oınalady.
Rýslan Igilik.
