1992 jyly alǵash ret táýelsiz Qazaqstannyń jańa memlekettik rámizderi bekitildi. Qazaqstannyń kók baıraǵy qazir BUU-nyń shtab páterinde álemniń ózge memleketteriniń týlarymen birge jelbirep tur.
Qazaqstan Prezıdenti shetelderge saparmen barǵanda, sport túrlerinen ótetin túrli álemdik dodalar men Olımpııa oıyndarynda sportshylarymyz jeńis tuǵyryna kóterilgen kezde Memlekettik Ánuranymyz shyrqalyp, Kók Týymyz kókke kóterilgenine aqparat quraldary arqyly talaı kýá boldyq. Bul kórinister rýhyńdy kóterip, keýdeńe maqtanysh sezimin uıalatady. Eltańbamyzdyń da aıbyny erekshe. Onyń sıpatynan egemen elimizdiń shejiresi men memleketimizdiń maqsat-muraty anyq ańǵarylady
Men Qostanaı oblysyndaǵy «Dýslyq» tatar-bashqurt etnomádenı birlestigine jetekshilik etemin. Túrli memlekettik jáne tarıhı mańyzǵa ıe ataýly merekeler qarsańynda biz óskeleń urpaqqa elimizdiń basty nyshandary jaıynda, olardyń paıda bolýy, máni men qadir-qasıeti týraly áńgimelep otyrýdy dástúrge aınaldyrdyq. Mundaı kezdesýlerde «Memlekettik rámizder» atty derekti fılm qoıylady. Bul fılmde táýelsizdigimizdi áıgileıtin Otanymyzdyń Týy, Eltańbasy, Ánurany jóninde jan-jaqty baıandalyp, rámizderdegi ulttyq tanym men salt-dástúr sıpattaryna jan-jaqty túsinik beriledi.
Urpaqqa otanshyl rýhtaǵy tárbıe berý memleketimizge, onyń tarıhyna, memlekettik rámizderine, tiline qurmetpen qaraýdan bastalady. Bul mindettiń kúrdeliligin Elbasy naqty paıymdap, «...bul mindet bilim berýdiń, mádenıet organdarynyń, qoǵamdyq uıymdardyń, buqaralyq aqparat quraldarynyń barlyq júıesine, árbir otbasyna qatysty. Al ony eldiń Týyn, Eltańbasyn, Ánuranyn qasterleýden, zańdy úkimetti qurmetteýge tárbıeleýden bastaý kerek. Árbir adam bala kezinen: Qazaqstan – meniń Otanym, onyń men úshin jaýapty ekeni sııaqty, men de ol úshin jaýaptymyn degen qarapaıym oıdy boıyna sińirip ósetindeı etken jón», deıdi. «Dýslyq» tatar-bashqurt etnomádenı birlestigi qurylǵan 1995 jyldan bergi shırek ǵasyr boıy Elbasymyzdyń osy sózin buljymas qaǵıda retinde ustanyp keledi desem, artyq aıtqandyq emes.
Memlekettik rámizder – Qazaqstannyń ótkeni men búginin hám bolashaǵyn baılanystyratyn qasıetti uǵym. Sondyqtan árbir otandasymyzdyń kók Týymyzǵa, Eltańbamyzǵa, memlekettik tilimiz ben Ánuranymyzǵa degen qurmeti erekshe sezilip turýy tıis. Rámizder jastardyń otansúıgishtik sezimin oıatady, patrıotızmge úndeıdi, batyldyqqa tárbıeleıdi. Qazir kóshede ketip bara jatqan kez kelgen balany toqtatyp, Ánurandy surap kórińizshi, saıraı jóneledi. Tipti memlekettik tildi bilmeıtin balanyń ózi Ánurandy jatqa biledi. Bul jastardyń boıynda memlekettik rámizderge degen erekshe súıispenshiliktiń, otanshyldyq sezimniń tunyp turǵanyn kórsetedi. Men osyǵan qýanamyn.
Rınad BEKTEMIROV,
Qostanaı oblystyq tatar-bashqurt etnomádenı birlestiginiń tóraǵasy
