Osy úsh aıda bazalyq mólsherleme shuǵyl túrde 9,25% -dan 12% -ǵa kóterildi, paıyzdyq dáliz +/- 1,5 paıyzdyq tarmaqqa deıin ulǵaıtyldy. Sodan keıin  kútpegen jerden - 9,5% deıin tómendedi, biraq sonymen birge paıyzdyq mólsherleme +/- 2 p.p. deıin keńeıtildi.

Mamyr aıynyń sońynda Ulttyq banktiń tóraǵasy Erbolat Dosaev bazalyq mólsherlemeni odan ári edáýir tómendetý uzaq merzimdi perspektıvada ekonomıkaǵa jaǵymsyz saldarǵa ákeletinin aıtty. Bul sonymen qatar bankterdiń resýrstyq bazasynyń tómendeýine ákelýi múmkin. Bul faktor   bankterde jeke tulǵalardyń depozıtteriniń aǵyp jylystap ketýine  alyp keledi.

Bul másele kezinde parlamentte kóterildi, depýtattyń suraýyna Ulttyq bank jaýap berdi: Ulttyq banktiń ekonomıkany 3-4%-dan bastap nesıelendirýdi bastaý úshin bazalyq mólsherlemeni tómendetýge barlyq jaǵdaılary bar ekendigi jáne bul máselege qajet kezde qaıta oralatyny aıtylǵan.  Sarapshylar bolsa, Ulttyq bank bazalyq mólsherleme týraly sheshim qabyldar kezde asyǵystyqqa jol bermeýi qajettigin, naryqtyń erkine salýǵa, naryqtyń ózi retteýine múmkindik berý kerektigin aıtady.  

Al búgin «Ulttyq bank qandaı sheshim qabyldaýy múmkin?» degen suraqqa sarapshylardyń basym kópshiligi  «ózgermeıdi, osyǵan deıingi deńgeıde qalady» dep jaýap berdi. Sebebi ishki naryqta  ózgeristerge bastaıtyn betburystar baıqalmaıdy. Qazir durysy sońyn kútýden ózge jol joq. Biz álemdik ekonomıkaǵa yqpal etetin kezge jetken joqpyz. Qazir biz úshin ózge naryqtarǵa qarap, ishki naryqtyń betalysyn solarǵa qarap úılestirýden ózge jol joq. Qarjyger Ilııas Isaevtyń paıymdaýynsha,   teńgeniń kúsh alýy paıyzdyq mólsherleme deńgeıin ózgerte almaıdy.  Bas bank bul jerde teńgeniń baǵamyna emes, ınflıasııany targetteýge ǵana basymdyq berip tur. Bul tusta Ulttyq banktiń róli retteýshi emes, paıyzdyq sheshimdi qabyldaıtyn trıggerdiń róline kóbirek uqsaıdy. 

«Qazir ınflıasııa deńgeıi 6.4 paıyz. Ol sol shekten asyp ketpeý úshin paıyzdyq mólsherleme deńgeıin kóterý kerek. Biz pandemııanyń qyspaǵynan endi bosap kele jatyrmyz. Dál qazir paıyzdyq mólsherlemeni kóterý jaǵdaıdy qıyndatyp jiberedi. Qazir ony ózgertýge sebep kórip turǵan joqpyn» deıdi Ilııas Isaev.