Bir qabatty ǵımarat 200 tósek-orynǵa arnalǵan, modýldi úlgi boıynsha salyndy. Gospıtal qaladaǵy "Aqjaıyq" shaǵynaýdanynda boı kóterdi. Ortalyq qalalyq juqpaly aýrýlar aýrýhanasynyń fılıaly bolyp tabylady. Munda koronavırýstyq ınfeksııaǵa kúdikti degen barlyq pasıentterdi qabyldaıtyn bolady. Ǵımarattyń jalpy aýdany - 6 myń sharshy metrden astam.
"Bizdiń juqpaly aýrýlar aýrýhanasynda kompıýterlik tomografııa esh ýaqytta bolmaǵan. Al bul jerde sıfrlyq rentgen apparaty bar. Sosyn 20 dana ókpeni jasandy jolmen jeldetý apparaty ákelindi", - deıdi qalalyq juqpaly aýrýlar aýrýhanasynyń bas dárigeri Amangeldi Nurlybaev.
Stasıonarda barlyǵy 300-den astam bilikti medısına mamandary qyzmet kórsetedi. Gospıtaldyń bir ereksheligi – munda operasııalyq blok pen perzenthana bólmesi bar. Sonymen qatar, reanımasııalyq zaldar «open space» qaǵıdaty boıynsha ashylǵan. Bul medısınalyq personalǵa pasıentterdiń jaǵdaıyn baqylaýdy jeńildetedi.
"Reanımasııa bólimshesi 20 tósek-orynǵa arnalǵan. Onyń ekeýi - ızolıator. Bizdiń bólimshe 2 zalǵa bólingen. 9 tósek orynnan onyń barlyǵy qoldanýǵa daıyn", - deıdi reanımasııa bóliminiń meńgerýshisi Bekqazy Esimov.
Stasıonardy jobalaý kezinde ǵımarattyń ishindegi epıdemıologııalyq rejımdi saqtaýǵa kóp kóńil bólindi deıdi mamandar. Al gospıtalde barlyǵy 200 tósek bar, olardyń 20-y bokstalǵan palatalarda, al 20-y reanımasııalyq bólimde ornalastyrylǵan.
