Italııada koronavırýs qurbany bolǵandardyń 50-ge jýyq týysy bılikke qarsy resmı shaǵym túsirip, sotqa berdi. Halyq olardy pandemııa órshigen tusta tıimdi sheshim qabyldaı almady dep aıyptaýda. Bul eldegi ujym bolyp qabyldanǵan alǵashqy zańdy qadam. Shaǵym Bergamo prokýratýrasyna berildi. Sebebi, toptyń bastamashy ókili Stefano Fýskonyń aıtýynsha, bul qala Italııa tragedııasynyń sımvoly boldy.
BBC agenttiginiń málimetinshe, Bergamo prokýrorlary tergeýdi Premer-Mınıstr Djýzeppe Konteden bastaıdy. Sondaı-aq Densaýlyq saqtaý jáne Ishki ister mınıstrlerinen jaýap alady dep kútilýde. Tergeý barysynda vırýs "qyzyl" zonadan asyp ketkenin bile tura, Nembro men Alzano qalalarynda karantın aqpan aıynan bastap nelikten jarııalanbaǵany týraly qaralady.
Italııanyń Densaýlyq saqtaý mınıstri Djýlıo Gallera 23 aqpan kúni Nembro men Alzanoda juqtyrýdyń kóptegen jaǵdaılarynan habardar bolǵanyn moıyndady. Soǵan qaramastan, Italııanyń soltústik aımaǵy 8 naýryzdan bastap qana karantınge jabyldy. Eldiń ortalyq bıligi Lombardııa provınsııasynyń bıligin der kezinde sheshim qabyldamaǵany úshin aıyptap otyr, biraq qarsy tarap eldiń tutas ýchaskilerin jabý týraly sheshimdi federaldyq úkimet ǵana qabyldaı alatynyn aıtady.
