Aımaqtar • 15 Maýsym, 2020

Batys Qazaqstanda ahýal áli turaqsyz

323 ret kórsetildi

Demalys kúnderi Batys Qazaqstan oblysynda koronavırýs ınfeksııasyn juqtyrǵan 47 adam tirkeldi. О́ńir boıynsha aýyrǵandardyń jalpy sany 967-ge jetti. Oblystaǵy 12 aýdannyń 11-inde vırýs juqtyrǵandar bar, degenmen aýrýdyń 82 paıyzy Oral qalasynan, dep jazady Egemen.kz

Jańadan tirkelgen naýqastardyń 56%-y vırýsty qarym-qatynas arqyly juqtyrǵany anyqtaldy. Bul  turǵyndardyń jeke qaýipsizdigin saqtamaı, sanıtarlyq talaptarǵa salǵyrt qaraýynyń nátıjesi,  dep málimdedi Batys Qazaqstan oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Muhamǵalı Aryspaev.

Muhamǵalı Qaıyrjanulynyń aıtýynsha, elimizde tótenshe jaǵdaı toqtatylyp, karantındik shekteýler jeńildegen sátten bastap, turǵyndardyń deni jaıbaraqat ómirge kóshken. Kópshilik jıyndar kóbeıip, toı maýsymy bastalyp ketti. "Qazaqstannyń bas memlekettik sanıtar dárigeriniń jańa qaýlysy boıynsha toılar men kóp adam jınalatyn úlken jıyndardy ótkizýge tyıym salynǵan. Memlekettik organdar men kvazımemlekettik sektordyń jumys tártibi 80%-ǵa deıin onlaın rejimge kóshirildi. Halyqqa qyzmet kórsetetin ortalyqtar da basym kópshilik qyzmetin qashyqtan atqarady, onlaın ótýge múmkin emes qyzmet bolsa, onyń ózin aldyn ala jazylý arqyly kórsetý kerek. Oral qalasynda da bazarlar kúndizgi saǵat 10:00 men 16:00 arasynda ashyq. Qoǵamdyq kólik – avtobýstar barlyq sanıtarlyq talaptardy oryndaı otyryp, tańǵy saǵat 6:00-den 21:00-ge deıin júretin bolady", deıdi Batys Qazaqstan oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy. Qazir batys Qazaqstan oblysynyń Syrym, Qaratóbe jáne Jańaqala aýdandarynda keıbir shekteýler engizilgen.

Oral qalasynyń ózinde №6 emhanasy, "Sentrkredıtbank" fılıaly, "Altyndar" saýda úıiniń óndiris sehy jáne "Sýrovskıı" sýpermarketi ýaqytsha jabylǵan. Sondaı-aq Oral qalasyndaǵy ortalyq saıabaq, barlyq túngi klýb, oıyn alańdary, býkmekerlik keńseler, kezekshi toptan basqa mektepke deıingi uıymdar da jumysyn toqtatqan. Bul atalǵan nysandardyń bárinde qyzmetkerlerdiń vırýs juqtyrǵany anyqtalǵan.

Batys Qazaqstan oblystyq densaýlyq saqtaý basqarmasynyń basshysy Bolatbek Qaıýpovtyń aıtýynsha, dál búgin juqpaly aýrýlar aýrýhanasynda 240 naýqas em-dom alyp jatyr eken. Onyń ishinde 6 bala bar.

− Tirkelgen naýqastardyń 64-i aýrýdyń sımptomsyz túrimen aýyrǵan. 58 adamda dert jeńil, 102 adamda ortasha ótýde. Al 16 adam koronavırýstyń aýyr túrimen aýyryp jatyr. Onyń ishinde 4 adam ókpeniń jasandy jeldetetin apparatyna qosylǵan,  dedi Bolatbek Amangeldiuly.

Batys Qazaqstan oblystyq densaýlyq saqtaý basqarmasy basshysynyń aıtýynsha, sońǵy kezde koronavırýstyń aýyr túrimen aýyratyndar kóbeıgen. "Ásirese pnevmonııa dıagnozymen túskender kóp, 53 adamǵa jetti. Olardyń bári de ottegige muqtaj, ıaǵnı ottegi betperdesin qoldanýda. Bul óte jaýapty jaǵdaı, biz olardy erekshe baqylaýǵa aldyq. Qazir jan saqtaý bóliminde – 7 adam, jedel terapııa bóliminde – 7 adam jatyr. Aýrýyn asqyndyryp, aýyr jaǵdaıda túsetinder kóbeıdi. Máselen, 5 maýsymda qosymsha qant dıabeti, júrektiń ıshemııalyq aýrýy syndy syrqattary bar 1938 jyly týǵan áıel adam aýyr jaǵdaımen tústi. Ol buǵan deıin óz úıinde emdelgen. Qoldanylǵan sharalarǵa qaramastan 10 maýsym kúni qaıtys boldy", deıdi Bolatbek Qaıýpov.

Kúni búgin Batys Qazaqstan oblysynda koronavırýs ınfeksııasynyń 376 oshaqta tirkelip otyr. 15 maýsymdaǵy kórsetkish boıynsha oblysta 100 myń turǵynǵa shaqqanda aýrýshańdyq kórsetkishi 147,3 qurady. 14 jasqa deıingi balalar arasynda 48 jaǵdaı tirkeldi.

13 maýsymda Batys Qazaqstan oblysynyń Bas memlekettik sanıtarııalyq dárigeri "Batys Qazaqstan oblysynyń aýmaǵynda koronavırýstyq ınfeksııanyń taralýyna jol bermeý boıynsha shekteý sharalaryn engizý týraly" qaýly shyǵarǵan bolatyn. Ol boıynsha banket, úılený toılary, mereıtoılar, otbasylyq, estelik, ádet-ǵuryp jáne ózge de adamdar kóp jınalatyn is-sharalar ótkizýge tyıym salyndy.

Jınalys, keńes, semınar, konferensııa syndy jıyndar selektorlyq rejımde jáne beınebaılanys arqyly ótedi. Joǵaryda aıtylǵandaı, memlekettik organdar men kvazımemlekettik sektor uıymdary qyzmetkerleriniń 80 paıyzy qashyqtan jumys tásiline aýysty.

Medısınalyq ortalyqtar men stomatologııalyq klınıkalar aldyn ala jazylý boıynsha saǵat 10:00-den 18:00-ge deıin qyzmet kórsetedi.

Sporttyq nysandar tek ashyq aýada, tek sportshylar úshin, onda da 30 adamǵa deıin ǵana kórermensiz qyzmet kórsete alady. Mádenıet nysandarynda da qyzmetkerler 30 adamnan aspaı, kórermensiz jumys isteıdi. Saýnalar, jeke jáne qoǵamdyq monshalar tek 20 adamǵa deıin qabyldap, saǵat 10:00-den 22:00-ge deıin qyzmet kórsetýi tıis.

− 20 maýsymnan bastap saýyqtyrý jáne sanatorııalyq nysandardyń jarty qýatymen jumys isteýine ruqsat beriledi, biraq kelýshiler densaýlyq jaǵdaıy týraly anyqtama jáne COVID-2019 zerthanalyq zertteýlerdiń nátıjesin alyp kelýi shart, − deıdi Muhamǵalı Aryspaev. Biraq joǵaryda aıtylǵandaı, oqýshylardyń jazǵy demalys ortalyqtary men lagerleri ázirge jabyq.

 

Batys Qazaqstan

Sońǵy jańalyqtar

Suıytylǵan gaz baǵasy óspeıdi

Qoǵam • 01 Shilde, 2022

Uqsas jańalyqtar