Foto: frequentflyers.ru
Mınıstrlik málimetinshe, evakýasııa bastalǵaly beri rezıdent jáne rezıdent emes áýe kompanııalarynyń 12 áýe reısi arqyly 3300-den astam otandasymyz elge oralǵan.
Azamattardy qaqtyǵys aımaǵynan shyǵarý basqa da tásildermen júrgizilip jatyr. Irandaǵy dıplomattar 6 naýryzda «Zarkýh» kompanııasynda jumys isteıtin 7 Qazaqstan azamatyn ıran-armıan shekarasyna jetkizýdi josparlap otyr. Buǵan deıin Tegeran men Erevandaǵy dıplomattar Iran aýmaǵynda qalǵan «Zarkýh» kompanııasynyń 34 qyzmetkeriniń elden shyǵýyn uıymdastyryp, olar avtobýspen ıran-armıan shekarasynan ótken edi. Jalpy Irannan búginge deıin 52 Qazaqstan azamaty elge qaıtaryldy.
«О́ńirdegi Qazaqstannyń dıplomatııalyq ókildikteri evakýasııa tolyq aıaqtalǵanǵa deıin jergilikti jerde úılestirý jumystaryn jalǵastyryp, shıelenis aımaǵyndaǵy otandastarymyzben turaqty baılanysta bolady», delingen Syrtqy ister mınıstrligi taratqan habarlamada.
Eske sala keteıik, Izraıl 28 aqpan, senbi kúni tańerteń Iranǵa soqqy jasady. Dýbaı, Abý-Dabı jáne Ras-el-Haımada júrgen Qazaqstan azamattary reısterdiń toqtatylýyna baılanysty elge qaıta almaı otyr. Al «Qazposhta» Taıaý Shyǵystaǵy jaǵdaıdyń shıelenisýine baılanysty halyqaralyq poshta jóneltilimderine ýaqytsha shekteýler qoıylǵanyn málimdedi.
Búǵan deıin Taıaý Shyǵystaǵy qaqtyǵys saldarynan 13 reıs toqtatylǵanyn jazǵan bolatynbyz. Sondaı-aq Taıaý Shyǵystaǵy ahýaldyń ýshyǵýyna baılanysty Qazaqstannyń shet elderdegi mekemeleriniń jedel baılanys jáne «jedel jeli» nómirleriniń iske qosylǵany habarlanǵan edi.
