Reseı mıllıarderi Roman Abramovıch Nıý-Iorktegi Ortalyq saıabaq kórinip turatyn jerdegi alty qabatty keń osobnıaktyń úlken bóligin satyp aldy. Bul týraly ITAR-TASS habarlady.
Jergilikti BAQ-tardyń jazýlaryna qaraǵanda, Abramovıch pen onyń nekesiz jubaıy Darıa Jýkova sońǵy kezderi Nıý-Iorkten ózderine qolaıly turǵynjaıdy jasyryn izdestiripti. Qazirgi ýaqytta Abramovıchtiń bólinip saýdaǵa shyǵarylǵan bes páterdiń úsheýin 75 mln. dollarǵa satyp alý jónindegi kelisimshartqa qol qoıǵany belgili bolyp otyr. Budan basqa, bıznesmen qalǵan eki páterdi de alý jóninde kelissóz júrgizip jatqan kórinedi. Ol osylaısha bes páterdiń basyn biriktirmekshi.
Jalpy aýmaǵy 900 sharshy metrdi quraıtyn úı ádette amerıkalyq baılar úı salyp alatyn Manhettenniń Joǵarǵy Ist-saıd dep atalatyn bedeldi aýdanynda ornalasqan. Ǵımaratty XIX ǵasyrdyń aıaǵynda kómir magnaty Edvard Bervınd turǵyzypty. Bastapqyda osobnıak páterleri ártúrli qojaıynǵa bólinetindeı jeke-jeke bolmaǵan, tutas bir ansambl retinde boı kótergen.
Eger Abramovıchtiń mundaǵy úı saýdasy osy úsh pátermen toqtar bolsa, olardyń puly Nıý-Iorktegi áldebir zamannan beri kooperatıvti ǵımarattardy satyp alý jónindegi baǵalardyń ishindegi eń joǵarysy bolǵaly tur. Munyń aldyndaǵy rekordty dál osyndaı Ortalyq saıabaq kórinip turatyn aýdandaǵy osobnıakty 54 mln. dollarǵa satyp alǵan amerıkalyq bıznesmen Devıd Geffen jasaǵan eken.
Saraptamashylardyń baǵalaýlary boıynsha, eger Abramovıchke qalǵan eki páterdi de kelisimi kelistirilip qoıylǵan úsheýmen biriktirýdiń oraıy kelip jatsa, reseılik mıllıarder Nıý-Iorktegi jalpy quny 100 mln. dollardan aıtarlyqtaı asyp túsetin eń qymbat osobnıaktyń egesi bolyp shyǵa keledi eken.
2013 jyldyń shildesinde Roman Abramovıch Chýkotııa avtonomııalyq okrýgi dýmasynyń tóraǵasy oryntaǵynan ketip, depýtattyq mandatyn tapsyrdy.
Tamyz aıynda óziniń «Ulttyq fýtbol akademııasy» dep atalatyn qorynyń da jumys jasaýyn toqtatqanyn habarlady. Bul qor Reseı quramasynyń bas jattyqtyrýshysy oryntaǵynda otyrǵan kezinde Gýs Hıddınktiń kontraktisine (7 mln. dollar – ITAR-TASS eskertpesi) demeýshilik kórsetý úshin qurylǵan bolatyn. Resmı emes málimetterge qaraǵanda, óziniń jumys istep turǵan ýaqyty aralyǵynda qor 200 mln. dollarǵa jýyq qarjy jumsap úlgergen eken.
Murat Aıtqoja.
