Endi Mac qurylǵylary tek Apple Silicon atty prosessorlarmen ǵana shyǵatyn bolady. Kompanııa buǵan deıin Intel ónimderin paıdalanatyn edi.
Bul iPhone nemese iPad-tarǵa qoıylatyn ARM-chıp emes, bul ázirge teńdessiz anaǵurlym kúshti prosessorlar ekeni aıtylýda. Apple A4-ten bastap A13-ke deıin chıpsetter jasaýdy ózi júzege asyryp, osy ýaqyt aralyǵynda tıimdi prosessor jasaýdy ábden meńgerdi. Osy kezeńde iPhone-nyń ónimdiligi 100 esege artqan. Sol sebepti kompanııanyń jańa ónimi eń úzdik prosessor bolýǵa laıyq.
Jańa operasııalyq júıe iOS 14 kórsetildi. Júıe ár jańarǵan saıyn Stıv Djobs izbasarlary oǵan eleýli jańalyq engizip otyrady. Endi gadjettegi qoldanbalar aýtomatty túrde toptastyrylady. Oǵan qosa ólshemderi ár túrli aýa raıy nemese saǵat sııaqty vıdjetterdi ekranǵa qoldanýshy ózi qoıa alady. Siri atty kómekshi budan bylaı 20 ese jyldam jumys isteıtin bolypty.
Kompıýter men noýtbýkke arnalǵan macOS Big Sur dep atalatyn jańa operasııalyq júıeniń tusaýy kesildi. Ol dızaın jaǵynan jańarǵan jáne ınterfeısi barynsha mobıldi iOS júıesine uqsatyp jasalǵan. Júıede vıdjetterdiń ólshemin ózgertýge bolady. Safari braýzeri endi 50 paıyzǵa jyldam jumys isteıdi jáne onyń kóptegen fýnsıonaldyq múmkindikteri jetildirilgen.
Sonymen birge Apple kompanııasynyń qol saǵat túrindegi gadjetteri men planshetteri úshin jańadan watchOS 7 jáne iPadOS 14 sııaqty jańa operasııalyq júıelerdiń shyqqany jáne AirPods qulaqqabynyń jetildirilgeni aıtyldy.
