Belsendi uzaq ómir ortalyǵy – eresek adamdar aǵylshyn tilin úırenip, kompıýterlik saýattylyq kýrstarynan ótip, emdik dene shynyqtyrýmen, bımen jáne t.b. aınalysa alatyn bos ýaqytyn ótkizý mekemesi. Nátıjesinde, egde jastaǵy qazaqstandyqtar qoǵamǵa belsendi túrde aralasyp, olardyń psıhoemosıonaldyq jaǵdaıy jaqsarýda. Ázirge mundaı ortalyqtar elimizdiń birneshe qalasynda ǵana jumys isteıdi.
Almaty qalasy «Belsendi uzaq ómir» ortalyǵy iske qosylǵan Qazaqstandaǵy alǵashqy óńir boldy. Ol 2018 jyly maýsym aıynda ashyldy. Ortalyq 75 adamǵa eseptelgen, biraq suranysqa baılanysty kún saıyn oǵan 350-ge jýyq adam qatysty. 2019 jyldyń sońyna qaraı qalanyń barlyq aýdandarynda dál sondaı 7 mekeme iske qosyldy. Baǵdarlama Dúnıejúzilik densaýlyq saqtaý uıymy ázirlegen qartaıý problemalary jónindegi Madrıd halyqaralyq is-qımyl josparynyń tujyrymdamasyn eskere otyryp ázirlendi. Qartaıý máseleleri jónindegi sarapshylar búkil el boıynsha belsendi uzaq ómir ortalyqtarynyń kóp bolýyn barynsha qajetti jáne ýaqtyly shara dep ataıdy.
«Bizdiń uıymymyzdyń basty mindetteriniń biri – aǵa býynnyń salamatty ómir saltyn qoldaý bolyp tabylady. Barlyq óńirlerde Belsendi uzaq ómir ortalyqtarynyń ashylǵanyna óte qýanyshtymyn. О́ıtkeni BUU esepteýleri boıynsha 50 jyldan keıin planetanyń árbir altynshy turǵyny egde jastaǵy adam bolady. Sondyqtan qazirden bastap qart adamdarǵa sapaly, ár túrli jáne belsendi ómir súrýdi qamtamasyz etý boıynsha jumysty bastaý asa mańyzdy», dedi «Ardager» QB tóraıymy Baıan Ahmetjanova.
Aıta ketý kerek, sońǵy 5 jylda 65 jastan asqan adamdardyń úlesi 2 esege artty. Nátıjesinde, halyqaralyq standarttarǵa sáıkes, Qazaqstan 2017 jyly halqy eseıgen elder tobyna kirdi.
