Qoǵam • 26 Maýsym, 2020

"NUR SUNQAR" baıqaýynyń jeńimpazdary anyqtaldy

"Nur Otan" partııasy Tóraǵasynyń birinshi orynbasary Baýyrjan Baıbek BAQ ókilderin kásibı merekemen quttyqtap, "NUR SUNQAR" respýblıkalyq konkýrsynyń jeńimpazdaryn jarııalady. Bul týraly ol Facebook-tegi paraqshasynda jazdy, - dep habarlaıdy Egemen.kz.

Marzhan Tileubekova

"Qurmetti jýrnalıster! "Nur Otan" Buqaralyq aqparat quraldary qyzmetkerleri kúni – kásibı merekesiniń qarsańynda dástúrli túrde "NUR SUNQAR" respýblıkalyq konkýrsyn osymen 11-shi ret ótkizip otyr. Búginde bul syılyq jýrnalıster qaýymy arasynda bedeldi de tanymal marapatqa aınaldy. "NUR SUNQAR" – medıa-qoǵamdastyq qyzmetkerleriniń elde júrip jatqan reformalardy qoldaý, qoǵamdyq mańyzy bar jobalardyń tabysty atqarylýy jáne halyqtyń keri baılanysyn qamtamasyz etý boıynsha sińirgen eńbegi men úlesin baǵalaýdyń bir kórinisi", - dep jazdy Baýyrjan Baıbek Facebook paraqshasynda.

Onyń aıtýynsha, konkýrstyq komıssııa bıyl birneshe jańa nomınasııa belgilegen. "Alǵy shep" – Tótenshe jaǵdaıdy jarııa etý boıynsha qajyrly eńbegi úshin", "Biz birgemiz" – volonterlik jumys týraly úzdik jarııalanym", "Partııanyń "qaıta jandanýy" boıynsha úzdik materıal" nomınasııalary. Jalpy 135 ótinim jáne 355 materıal berilgen.

"Pandemııaǵa baılanysty qalyptasyp otyrǵan qazirgi jaǵdaı bizdiń saltanatty sharany ótkizý jónindegi josparymyzdy túbegeıli ózgertti. Bıyl bizge partııalyq syılyqty saltanatty túrde tapsyrý rásiminen bas tartýǵa týra kelip otyr. Bul – amalsyzdan jasalyp otyrǵan qadam. Buǵan barsha qatysýshylar túsinistik tanytady dep senemin.

Partııamyzdyń Lıderi, Elbasy Nursultan Nazarbaev árdaıym jýrnalısterdiń shyǵarmashylyǵy elimiz ben halqymyzdyń ıgiligine baǵyttalǵan izgi isterge uıytqy bolýyn qalady. Sondyqtan da konkýrstyq komıssııa el damýynyń ózekti máselelerin jaryqqa shyǵarýǵa eleýli úles qosqan úzdik sóz zergerlerin iriktep aldy", delingen jazbada.

"NUR SUNQAR" baıqaýynyń jeńimpazdary:

"Televızııa úzdigi" – Salamat Omash, "Qazaqstan" ulttyq arnasy

"Ushqyr qalam" – Aıgúl Halyqova, "Egemen Qazaqstan" gazeti

"Únjarııa" – Lázzat Ábdireeva, NS radıosy

"QAZNET úzdigi" – Albert Ahmetov, zakon.kz

"Partııanyń qaıta jandanýy" – Nurıslam Ǵumar, "Qazaqstan-Atyraý" telearnasy

"Elbasy salǵan sara jol" – Serik Maleev, altynorda.kz

"Blogosfera úzdigi" – Aıdos Juqanuly

"Alǵy shep" – Irına Álimjanova

"Biz birgemiz" – Ásel Tursynǵazına, "Habar" telearnasy

"Partııanyń atynan jáne jeke óz atymnan "NUR SUNQAR - 2020" syılyǵynyń jeńimpazdaryn laıyqty marapattarymen quttyqtaımyn! Buqaralyq aqparat quraldary qyzmetkerleriniń kásibı merekesi – Jýrnalıster kúni qutty bolsyn! Barshańyzǵa myqty densaýlyq, baq-bereke jáne shyǵarmashylyq mol tabys tileımin!" - dedi Baýyrjan Baıbek.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz