Búginde qolǵa alynyp jatqan saqtyq sharalary osy kezge deıin eskerilmeı kelgen kóptegen kemshiliktiń betin ashyp, olardy joıýdyń joldaryn kórsetip berdi. Qalaı degende de, bul qaterli indettiń aldyn alýǵa septigin tıgizetini sózsiz.
«Vedomstvoaralyq komıssııa ózine júktelgen mindetti atqarýǵa shamasy jetpedi. Muny ashyq moıyndaý kerek. Densaýlyq saqtaý mınıstrligi ortalyq jáne jergilikti bılik organdarynyń jumysyn úılestire almady», dedi Memleket basshysy.
Prezıdent tarapynan qabyldanǵan koronavırýs indetiniń taralýyna qarsy kúres sharalary azamattardyń ómiri men densaýlyǵyn qorǵaý maqsatynda júzege asyrylýda. Álemde qalyptasqan kúrdeli ahýalǵa, ıaǵnı koronavırýstyń taralýyna qatysty elimizde qatań karantın engizilgeni búkil halyqtyń densaýlyǵyn saqtaý úshin qabyldanyp otyr.
Sondaı-aq Prezıdent bul qıyndyqtan da shyǵýǵa bolatynyn jetkizdi. Halqymyzda «Aýyryp em izdegenshe, aýyrmaıtyn jol izde» degen naqyl sóz bar. Sondyqtan qaterli aýrýdyń aldyn alyp, onyń keń etek alyp ketýine jol bermeý úshin bərimiz jumyla kúreskenimiz jón. Prezıdenttiń koronavırýs indetiniń taralýyna qarsy kúres sharalaryn engizý týraly osy shuǵyl sheshimin memleketimiz ben halqymyzdyń taǵdyryn oılaıtyn ərbir azamat qoldaıdy dep oılaımyn. О́ıtkeni qaýipti vırýs qaýipsizdikti kúsheıtýdi talap etedi.
Sonymen qatar Qasym-Jomart Toqaev laboratorııalyq zertteýlerdiń tıimdiligin arttyrýdy, reagentter men jumsalatyn materıaldardyń úzdiksiz jetkizilýin sheshýdi, PTR-zerthanalardyń sany men qýatyn arttyrýdy tapsyrdy. Azamattardy qajetti dári-dármektermen qamtamasyz etip, emdeýdiń mańyzdylyǵyna da toqtaldy. Osy rette problemalardy sheshý úshin Úkimet pen óńirlerdiń ákimderine barlyq qarjylyq jáne ınfraqurylymdyq resýrstardy jumyldyrý tapsyryldy.
Halqymyz «Birlik bar jerde tirlik bar» deıdi. Prezıdent aıtqan barlyq is-sharalardy ornymen júzege asyra bilsek, barlyǵymyz tərtipke baǵynyp, osy iske atsalyssaq, qaýipti indettiń taralýyna jol bermeımiz. Al elimizde jasalyp jatqan jumystar, qaýipsizdik sharalary óz nətıjesin beredi degen oıdamyn.
Erlan SYDYQOV,
L.N.Gýmılev atyndaǵy Eýrazııa ulttyq ýnıversıtetiniń rektory, akademık
