QYRǴYZ AǴAIYNDAR TAǴY DA ShAIQASQA ShYQTY

Alataýdyń ar jaǵynan taǵy da jaısyz habar estildi. Máseleni mámilemen sheshý ornyna bir-birine taıaq ala umtylyp, áli jet­keni óltirýden de taıynar emes. Múlikti tonap nemese qıratyp, úıdi órtep, bilgenderin isteýde. Taǵy da revolıýsııa. Qyrǵyz aǵaıyndar 2005 jylǵy oqıǵalardy taǵy da qaıtalap otyr. Árıne, ár  el óz jolyn ózi tańdaıdy desek te, qyrǵyz halqynyń taǵdyrly kún­derdi bastan keship jatqany anyq. Búgingi oqıǵa erteńgi kúni qalaı jal­ǵasatynyn dóp basyp aıtý qıyn. Bul elde bılik pen oppozı­sııa­nyń arasyndaǵy shıelenis áste de úzilmeıdi. Onyń bir sát kóterilip, onan soń birshama báseńdeıtin kezderi bar. О́tken aıdyń orta­syn­da oppozısııa men bılik kezek­tesip quryltaılar ótkizgende, sol shıelenistiń birshama sharyq­ta­ǵan­daı kezi bolǵan. Sirá, bılik endi oppozısııanyń qaıta bas qosyp, uıym­shyldyqpen áreket etetinin kúte qoımaǵandaı. Endi qarsy­las­tar­dyń mámile jolyn izdemeı, óz raılarynan qaıtpaýy otqa maı quıǵandaı boldy. Alǵashynda seı­senbi kúni Talas oblysynda, onyń ortalyǵynda bolǵan qaqtyǵys lezde búkil eldi sharpyp, aqyryn­da Bishkek qalasy otqa orandy. Iá, revolıýsııa Qyrǵyzstanǵa qaıta oraldy. Bul ótkendegiden de qyzýlaý dese, artyq emes. Kóteril­gen halyq ótkenniń tájirıbesinen sabaq alǵandaı. Quqyq qorǵaý oryndarynyń adamdary kóz ashy­tatyn gazben, ári ketse rezińke oq­pen atatynyn ańǵarǵan kóteri­lisshilerdiń taıaq pen tas qarýlary áldeqaıda kúshti edi. Olar barlyq jerde de jeńiske jetip jatty. Oqıǵanyń barysyn táptishtep aıtýdyń ózi artyq. Ol saǵat saıyn ózgerip jatady. Sársenbi kúni qyr­ǵyz astanasy úlken shaıqastyń alańyna aınalǵandaı boldy. Res­pýblıkada tótenshe jaǵdaı jarııa­lanyp, Bish­kek­te komendanttyq saǵat engizil­genine qaramaı, kóte­ri­lisshiler men quqyq qorǵaý oryn­dary adam­dary­nyń arasynda qaqtyǵys tolastamady. Kóshe­ler­de, alańdarda múmkin bolǵan nár­se­niń bári qıratyldy. Úılerdiń terezeleri shaǵylyp, máshıneler tóńkerilip, órteldi. Quqyq qorǵaý oryndarynyń kúshteri oppozısııa jetekshilerin qamaýǵa alǵannan keıin sherýge shyq­qandardyń áreketteri buryn­ǵy­dan da kúsheıe tústi. Olar qar­sy­las­tary­nyń qarýlaryn tartyp ala bas­tady. Budan keıin alańǵa jınalǵan halyqtyń qoldaýymen olar úki­met­tik ǵımarattarǵa sha­býyl jasady. So­nyń saldarynan bas prokýra­týranyń, parlament­tiń, ulttyq qaýipsizdik qyzmetiniń ǵımarattary otqa orandy. Oppo­zı­sııa jetekshi­leri qamaýdan bo­satyldy. Bul elden naqty resmı habar alý qıyn. Úkimettiń tolyq qu­ramyn­da qyzmetinen ketkeni ha­barlandy. “Halyq senimi úkime­tine” basshy­lyqqa taǵaıyndalǵan oppozısııanyń bir kósemi R.Otyn­baeva oppozı­sııanyń eldegi bılikti qol­daryna alǵanyn, sóıtip, ýaqyt­sha úkimet qurylǵanyn, onyń eldegi jaǵdaıǵa tolyq baqylaý ja­sap otyrǵanyn málimdedi. Bir de­rekterge qaraǵanda, prezıdent Qurmanbek Bakıev pen qorǵanys mınıstri B.Qalyev Oshtaǵy pre­zıdent rezıdensııasynda bolsa kerek. Qarýly qaqtyǵys bolǵan jerde ólim bar. Densaýlyq saqtaý oryn­dary qaza bolǵandar sanyn elýden asyryp otyr. Jaralanǵandardy jatqyzatyn oryn jetpeýde degen aqparat bar. Mamadııar JAQYP.