Batys Qazaqstan oblysynyń ortalyǵy – Oral qalasy kóshe boıymen ketip bara jatqan kóliktiń júrgizýshige qaıyrý bermeı, «óz betinshe» joldyń jıegindegi úıge baryp soǵatyn aıryqsha bir qonys bolyp tur. Bul shaharda qazannyń 12-si kúni taǵy bir kólik osylaı kósheniń jıegindegi úıge baryp, qoıyp ketti. Munyń jaıyn «Ýralskaıa nedelıa» habarlady.
Tańǵy saǵat 4-tiń kezinde «BMW H-5» avtokóligi qabyrǵasyn buzyp kirgen úıdiń ıesi Aıbar Qaıyrov bylaı deıdi:
«Men buzylǵan qabyrǵanyń janynda uıyqtap jatyr edim. Shlakty blok qabyrǵanyń jaryqshaqtary ústime kelip quıyldy. Kólikte birneshe jigit pen bir qyz otyr eken. Qabyrǵaǵa soqqanan keıin olar dereý basqa máshınege minip ketip qaldy».
Sol túni taǵy bir kólik oblystyq fılarmonııanyń qabyrǵasyn buzyp kiripti.
Osymen tek bıylǵy jyldyń ózinde Oral qalasynda tórtinshi máshıne kóshe jıegindegi úıge kirip ketti. Onyń birinshisi oblys ákimi orynbasarynyń balasyna tıesili kólik edi. Keıin tizgindi 23 jasar stýdent jigittiń ózi emes, onyń dosy ustaǵan degen tujyrym jasaldy. Budan keıin taǵy bir kólik osy «erlikti» qaıtalady. Endi, mine, oraldyq júrgizýshelir «altyn shyqqan jerdi belden qazyp», jol jıegindegi úılerdiń ishine aǵyzyp kirip ketýden ózindik bir jarysty bastap ketken sııaqty.
Qurysh Nurymbet.
