Fýtbolshy Andreı Arshavınniń keıin deregi bilingen Darıa esimdi jańa qurbysynyń Sankt-Peterbýrgtegi bir jol-kólik oqıǵasyna qatysty taǵy da aty shyǵyp jatyr. Bul týraly «Fontanka.Rý» saıty habarlady.
Negizinen kólikterdiń soqtyǵysyna osy áıel kináli sııaqty. Biraq ol oqıǵanyń basqa qatysýshylarymen biraz daýlasqanǵa uqsaıdy. Onymen qoımaı, tanymal fýtbolshynyń qurbysy degen mártebesin de ájeptáýir buldaǵan syńaıly.
Oqyrmannyń esinde bolar, biz osydan birneshe kún buryn Ázerbaıjanda taraıtyn aqparat agenttikteri arqyly bilgen deregimiz boıynsha, A.Arshavınniń bir ázerbaıjan qyzymen áýeıi bolyp júrgeni týraly habar usynǵanbyz. Shyny kerek, ol kezde bul boıjetkenniń aty-jónin ózimiz de bile bermeıtin edik. Al endi bilip otyrmyz. Joǵaryda baıandalǵan jol-kólik oqıǵasy jaıly aqpardy aqtaryp otyryp, onyń esimi Darıa ekenine kóz jetkizdik. Jáne ol eshqandaı da boıjetken emes, eki bala tapqan áıel bolyp shyqty.
A.Arshavın sonyń aldynda ǵana uzyn boıly, qara shashty sulýmen Pıterde ótken Fedor Bondarchýktiń «Stalıngrad» atty fılminiń tusaýkeserine barady. Fýtbolshy «Zenıttiń» resmı beıne betterinde jańa kánızágimen birge kórine qoımaǵanymen, olar ózderin sýretke túsirip jatqan fotograftan jasyryna qoımaıdy. Keıin jýrnalıster fýtbolshynyń jańa áýeıisiniń jasy 35-te ekenin, sport jýrnalısi bolyp isteıtinin, kúıeýimen ajyrasqanyn, eki bala tárbıelep jatqanyn bilip alady.
Internet jelisine salynǵan sýretterge qaraǵanda, Andreı men Darıa kópten beri bir-birimen qatysyp júrgen sııaqty. Ras, bul ekeýiniń basketbol matchyn kórip otyrǵan kezinde basylyp alynǵan sýretteri bıylǵy mamyrda túsirilgen. Alaıda, bulardyń onyń arǵy jaǵynda biraz buryn aralasyp ketkeni baıqalady. Bul tanystyq Andreıdiń London «Arsenalyna» ketýinen de buryn bastalǵan tárizdi. Olaı bolsa, 32 jasar fýtbolshyny azamattyq nekedegi áıelinen alyp ketken de osy bolýy ábden yqtımal.
Al Arshavın ózimen 9 jyl birge turyp, úsh bala týyp bergen jubaıy Iýlııadan budan shamaly ǵana buryn ketip qalǵan bolatyn.
Sáken Maılybaı.
