Keleshegi kemel bastama

Bilim • 15 Shilde, 2020

Keleshegi kemel bastama

Volonterlik bastamalar búginde Qazaqstan úshin óte ózekti taqyrypqa aınalyp otyr. Qazaqstandyqtarda, ásirese jastarda qoǵam ıgiligi úshin erikti eńbekke árkimniń atsalysýy qajet ekeni, sonymen birge búkil eldiń tabysty ómiriniń alǵysharty degen túsinik qalyptasa bastady. Biz de qaraǵandylyq jastardyń qoǵam ómirine belsendi aralasyp, azamattardyń ómirine beıjaı qaramaýlaryna baýlyp jatyrmyz.

Egemen Qazaqstan

Adam áleýetin ashýdyń, bilim alýshylarǵa jaqsy tárbıe berýdiń jáne áleýmettik tájirıbeni damytýdyń eń tıimdi jáne maqsatty quraldarynyń biri – volonterlik qyzmet. Volonterlik oqytý men tárbıeleýdegi ınnovasııalyq tárbıelik tásil sanalady. Osy arada «Azamat» qoǵamdyq birlestiginiń uıymdastyrýymen «Birgemiz: Bilim» jalpyulttyq jobasy aıasynda aýyl mektepteriniń 200-ge jýyq joǵary synyp oqýshysyna aǵylshyn tili, kompıýterlik saýattylyǵyn arttyrý boıynsha kýrstar uıymdastyrylyp, keshendi jumys júrgizilýde.

Kompıýterler kúndelikti ómirimizdiń bir bóligine aınaldy. Qazir tehnologııalar qoldanylmaıtyn qandaı da bir salalardy elestetý qıyn. Osy sebepti joba aıasynda aýyl mektepteriniń joǵary synyp oqýshylaryna kompıýterlik saýattylyq arttyrý boıynsha oqytý kýrstary uıymdastyryldy. Kýrs barysynda oqýshylar «Jasandy ıntellekt», «Ǵylymı tehnıkalyq jobalar», «Photoshop», «Sapaly vıdeo jasaý», «Kıberqaýipsizdik» taqyryptarynda bilimin jetildirip, tájirıbesin shyńdaıdy. Jazǵy demalys kezinde oqýshylarǵa paıdaly aqparat berip, bolashaqta qajet mashyq úıretken volonter, «Smart zhardem» jobasynyń avtory Bolat Babek kýrs júrgizdi.

Odan bólek HHI ǵasyrdaǵy taǵy bir negizgi talapqa aınalǵan aǵylshyn tili máselesi de nazardan tys qalǵan joq. О́zderińiz biletindeı, qazir aǵylshyn tili tek shetelde jumys istep, ómir súrý úshin emes, elde otyryp ta qajet aqparat oqyp, ǵalamdyq tendensııalardan habardar bolýǵa jol ashady. Derekkózderden aqparat alyp, oqıǵanyń mán-jaıyn túsinýge de aǵylshyn tili qajet. Jastardyń ana tilimen birge shetel tilin bilýi de búgingi zamannyń basty talabyna aınaldy. Sol sebepti «Birgemiz: Bilim» jalpyulttyq jobasy aıasynda aýyl mektepteriniń joǵary synyp oqýshylaryna aǵylshyn tili kýrsyn ótkizýdi jón kórdik. Aǵylshyn tilin úıretýshi – jas ustaz, jobanyń volonteri Botagóz Zaıdýllına. Álemdegi sońǵy jaǵdaılarǵa baılanysty sabaqtar onlaın rejimde ótti. Nátıje jaman emes. Oqý baǵdarlamasy tez jáne ońaı ıgeriledi. Sabaqtar da sońǵy tehnologııalarǵa negizdelip, tyń ádistemeler qoldanylyp, qyzyqty ótti. Oqýshylar buryn-sońdy túsinbegen taqyryptaryn qaıta qarap, muǵalimnen tyńǵylyqty jaýap aldy.

«Birgemiz: Bilim» jalpyulttyq jobasy Aqparat jáne qoǵamdyq damý mınıstrligi, Qaraǵandy oblystyq Jastar saıasaty máseleleri basqarmasy jáne Qaraǵandy oblysy Bilim basqarmasynyń qoldaýymen, Azamattyq bastamalardy qoldaý ortalyǵynyń memlekettik granty sheńberinde júzege asyrylyp jatqany málim. Bul kýrstar aldaǵy ýaqytta da jalǵasyn taýyp, talaı jastyń armanyna qol jetkizýine septigin tıgizedi degen senimdemiz. Volonter jyly sheńberinde belgilengen volonterlik baǵyttar boıynsha basqa da is-sharalar qolǵa alynyp, rýhanı, mádenı muralardy dáripteý, jastar arasynda tanytý boıynsha da keshendi jumystar atqarylýda.

«Birgemiz: Bilim» jalpyulttyq jobasy aıasynda kýrstar sanyn arttyryp, qamtıtyn aýdandar sanyn da kóbeıtý jolǵa qoıylǵan. Pandemııa kezinde jastarǵa qashyqtan oqytý degenniń ózin-ózi damytýǵa taptyrmas múmkindik ekenin is júzinde kórsetýge múmkindik ashylyp otyr. Olarǵa onlaın oqýdyń qyr-syryn kórsetip, keleshekte halyqaralyq ýnıversıtetter usynǵan sheteldik platformalarda da ózdiginen bilim alýǵa baýlýdy maqsat ettik. Rasymen, adam úzdiksiz bilim alýy qajet. Al izdengen, nıetti adamǵa qashanda jol tabylary sózsiz. Aýyl-aımaqtaǵy balalardyń munan habary bola bermeıtini anyq. Sondyqtan aǵylshyn tili men kompıýterlik saýattylyq kýrstarynyń osy oraıda paıdasy mol ekenine kúmánimiz joq.

Dáýren RAHYMBEK,

volonter

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz