Bulaq Bórte ózenine qaıta quıa bastady

Bórte ózenine quıatyn osy bu­laqtyń kózin buryn aýyldyń aq­saqaldary shóp-shalamnan tazartyp, mal aıaǵy taptamaıtyndaı etip jyl saıyn jaǵasyn bıiktetip otyratyn. Biraq aqsaqaldar ómirden ótken soń ári aýyl turǵyndarynyń kóbi kóship ketken talaı zamannan beri syldyrap aǵyp jatqan tushy bulaqty jurt umytty.

Atalǵan aýyl mektebiniń qyzmet­keri Nıkolaı Fýnt osy jazda shóp shaýyp júrgende bulaq týraly qarttardan estigen sózdi esine alyp, dereý mektep qyzmetkerlerine aıtty. Sodan Qarataýsaı mektebiniń bir top qyzmetkerleri – sharýashylyq meńgerýshisi Gúlzada Álmuhambetova, kishi tehnıkalyq qyzmetker Raısa Polýda, muǵalimder Anastasııa Sınenko men Nurgúl Ospanova jáne Nıkolaı Fýnt kúrek-saımandaryn alyp, bulaqty tazartýǵa bardy.

– Biz eń áýeli Nıkolaıdyń kórse­týimen bulaq kózi bolýy tıis jerge baryp, birneshe jerden qazyp kórdik. Bir shuńqyrǵa kelgende kúregi­mizdiń basyna dymqyl laı jabys­ty. Sol jerdiń jan-jaǵyn qolymyzben arshyp, tereńdeı qazǵanda sup-sýyq ári beti dymqyldanǵan topyraq qabatynan laı sý shyqty. Sodan jabylyp arshyp, biz kútken bulaq kózine jettik. Sý birtindep molaıyp, kózin tazartqan saıyn laı qabaty ózgerip, móldirlene berdi. Sý molaıǵan saıyn burynǵy arnasyn taýyp, Bórte ózenine qaraı aǵa bastady. Biz de bulaq sýyn qýalaı otyryp, arnasyn da tazalaı óttik. Bulaq kózin qorshaı taspen órip, burynǵy qalpyna keltirdik. Sý qashanda óz arnasyn tabady ǵoı. Jylǵa bop aqqan bulaq sýynyń sońynan ere otyryp, burynǵy arnasyn taptyq. Sóıtip bulaǵymyz Bórtege qosyldy, – deıdi Gúlzada Álmuhambetova.

Bórte – Qarataýsaı eldi meke­niniń qaq ortasynan aǵyp ótetin shaǵyn ózen. Aýyl adamdary úshin tirshilik kózi. Jaǵasyna buzaý, qozy-laqtar jaıylady, aýyl qaz-úırekteri jaz boıy Bórteniń sýynan shyqpaıdy. Alaıda sońǵy jyldary ózen tartylyp, sýy laılanyp, keı jerinde shalshyqqa aınal­dy. Aýylǵa tirshilik berip tur­ǵan ózendi qalpyna keltirýdiń bir amaly – ózen jaǵalaýlaryndaǵy kómi­lip qalǵan bulaq kózderin ashý. Al Bórteniń jaǵasynda mundaı bulaqtar kóp. Aýyl muǵalimderi osy bulaqtyń jan-jaǵyn abattandyryp, qudyq tur­ǵyzyp, basyna adamdar tynyǵatyn oryn­dyqtar qoıý kerektigin aıtady. Bul iske aýyl adamdarynyń báriniń jumylýy qajet.

Elena ONISKOVA,

«Mártók tynysy» aýdandyq gazetiniń redaktory

Aqtóbe oblysy,

Mártók aýdany