Mine, osyndaı tyǵyryqqa tirelgen sátte Qaraǵandydaǵy «Mereı» medısınalyq fırmasy» JShS betperde jáne basqa da medısınalyq jeke qorǵanys quraldaryn óndirýdi jolǵa qoıa bildi. Atalǵan fırmanyń dırektory Qanat Naýryzbaev sol kezde medısınalyq maskalar shyǵaratyn mashına satyp alǵandaryn málimdegen edi.
– Bul apparat bir mınýtta 100-120 dana betperde shyǵarýǵa qaýqarly. Bizdiń maskalar úsh qabatty. Biz oblys turǵyndarynyń ınfeksııadan qorǵanys qajettiligin tolyǵymen jaba alamyz, – degen bolatyn ol.
Rasynda da, kóp uzamaı Qaraǵandy men oblystyń basqa óńirlerindegi dárihanalarǵa otandyq maskalardyń kóp mólsherdegi partııasy jetkizilip, qoljetimdi baǵamen satyla bastady. Sóıtip, oblys boıynsha maska jetispeýshiligin az da bolsa baqylaýǵa alýǵa múmkindik týǵan.
Jalpy, atalǵan fırma medısınalyq nysandaǵy bir rettik ónimderdi shyǵarýdy 2011 jyldyń maýsym aıynan bastap qolǵa alǵan eken. О́nimderdiń qatarynda betke arnalǵan úsh qabatty maskalar, polıetılennen jasalǵan bahıla men halattar boldy.
– Bul jumystardy bastaǵanymyzda kóptegen sheshilmegen máseleler aldymyzda turdy. Ol kezde shıkizatty Qytaıdan ákeletinbiz. Qazirgi tańda biz medısınalyq jeke qorǵanys quraldaryn óndirýdi qaıta jandandyra bastadyq. Reseıdiń Qazan jáne Novosibir qalalarynan shıkizat jetkizý máselesi sheshimin tapty. Bizdegi sehtyń óndiristik qýaty táýligine 20 myń maska shyǵarýǵa jetedi, – deıdi Qanat Naýryzbaev.
«Mereı» fırmasynyń óndiristik sehynda polıetılendi bahıldardy shyǵarý úshin tómengi qysymdy polıetılen, «Spanbond» materıaldary jáne elastıkalyq rezeńke baý paıdalanylady. Úsh qabatty qorǵanys betperdelerin daıyndaý úshin «Spanbond», «Melblaýn» «Spanleıs» materıaldary, muryn fıksatory – polıpropılendi ótkizgish, elastıkalyq, sıntetıkalyq jipterden jasalǵan rezeńkeler iske jaratylady.
Budan bólek, medısınalyq mekemede nefro-ýrologııalyq ortalyq jumys isteıdi. Bul jerde gemodıalızdi emdelýdi qajet etetin naýqastarǵa qyzmet kórsetiledi, olardyń sapaly gemodıalız alýlaryna barlyq jaǵdaılar jasalǵan. Germanııalyq «Fresenius Medical Care» zaýytymen kelisimshart jasalyp, gemodıalızge qajetti qazirgi zamanǵy apparattar alynǵan. Budan basqa, zaýyt jumysqa jáne servıstik qyzmet kórsetýge qajetti barlyq shyǵyn materıaldaryn jetkizip beredi. Fırma dıalızdi qajet etetin naýqastardy tamaqtandyrý shyǵyndaryn túgeldeı óz moınyna alǵan. Sonymen qatar gemodıalızdi emdeýdi qajet etetin naýqastardyń tasymalyn da qamtamasyz etedi.
Oblys turǵyndaryna medısınalyq, bilikti, konsýltatıvtik-dıagnostıkalyq kómek berýdi maqsat etetin «Mereı» fırmasynyń negizi 2008 jyly qalanǵan. Búginde mekeme medısınalyq qyzmetterdiń sapasyn jetildirý boıynsha únemi izdenis ústinde júrip, aýqymdy jumys atqarady. Osy maqsatta eýropalyq jetekshi kásiporyndarmen tikeleı baılanys ornatqan. Qazaqstanda alǵashqylardyń biri bolyp medısınalyq bir rettik jıyntyqtardy – medısınalyq maska, bahıl, kıim shyǵarýdy óndiristik jolǵa qoıǵan. Rasyn aıtqanda, elimizdiń qazirgi naryǵynda mundaı otandyq ónimder asa kóp emes.
Turǵyndardy búgingi asa qajetti taýarlarmen jáne medısınalyq minsiz qyzmetpen qamtamasyz etýdi qolǵa alǵan kásiporyn keleshekke senimmen qaraıdy.
Qaraǵandy oblysy
