"Dostar, sońǵy aptalarda mádenıet, óner jáne sport salasy qaıratkerleriniń syrqattanyp qalǵany týraly habarlar birinen soń biri jetip jatyr. Qýanyshqa oraı, kóbi jazylyp, saýyǵyp ketip jatyr, tek, ókinishtisi, bári emes. Kóz jumǵan adamdardyń ishinde mádenıet, óner sport qaıratkerleri de bar. Jazýshy, aqyn, kompozıtor, kınorejıssıor, ssenarıı jazýshysy, teatr zertteýshi, ǵalym, oqytýshy, óner sańlaqtary... Orny tolmas qaza, kókirek toly ókinish... Búgin Qojamıarov atyndaǵy Memlekettik respýblıkalyq uıǵyr mýzykalyq komedııa teatrynyń ártisi Zenátgúl Aqbarova, memleket qaıratkeri, professor, Jazýshylar odaǵynyń múshesi Myrzageldi Kemel, ádebıet zertteýshisi Qadyrbek Ýálıev dúnıe saldy. Prodıýser Murat Erǵalıevten aıyrylǵanymyz týraly da habar jetti. Mádenıet jáne sport mınıstrligi jáne jeke óz atymnan qaıtys bolǵandardyń otbastaryna, týǵan-týystaryna qaıǵyryp kóńil aıtamyn. Bekem bolyńyzdar. Murat aǵany jaqsy tanýshy edim. Murat Ájimuly búkil sanaly ǵumyryn televızııa salasyna arnap, elimiz Egemendikke qol jetkizgen syndarly sátte onyń damýyna ólsheýsiz úles qosty. Shet memleketterde de keńinen tanymal bolǵan "Azııa daýysy", "Jas qanat" baıqaýlaryn joǵary deńgeıde uıymdastyryp, jas daryndarǵa óner álemine jol ashty. Murat Erǵalıevtiń meıirimdi, parasatqa toly jarqyn beınesi barsha jaqyn adamdarynyń júreginde saqtalady", - dedi mınıstr.
Mınıstr bul kúreste adamzattyń jeńetinine senimdilik bildirdi.
"Bul indet eshkimge aıaýshylyq bildirmeıdi. Búkil ult - memleket, dárigerler, eriktiler, mesenattar, janashyr jandar - bári adamzatqa kesirin tıgizip, adam ómirin qıyp jatqan koronavırýsqa qarsy kúresý úshin birigip otyr. Adam ómirinen asqan qundylyq joq ekeni haq. Bul kúreste adamzattyń jeńetinine senimdimin! Barshańyzǵa myqty densaýlyq tileımin, jaqyndaryńyzdy qorǵap, qarym-qatynasty azaıtyp, sanıtarlyq normalardy saqtańyzdar degim keledi. Syrqattanyp qalǵandardyń osy synaqtan aman-esen ótip, jazylyp ketýin tileımin. Saqtanyp júrińizdershi! Biz qıyndyqty mindetti túrde eńseremiz", - dep jazdy Aqtoty Raıymqulova.
