Qazaqstan • 20 Shilde, 2020

1 mln-nan astam qazaqstandyq 5556 teńgeden tólem alady

7821 ret kórsetildi

1 mln-nan astam qazaqstandyq azyq-túlik jáne turmystyq jıyntyqtar úshin tólem alady. Bul týraly Egemen.kz mınıstrliktiń baspasóz qyzmetine silteme jasap habarlaıdy.

"Eńbek jáne halyqty áleýmettik qorǵaý mınıstrligi aǵymdaǵy jyldyń shilde aıynda azyq-túlik jáne turmystyq jıyntyqtar úshin qarajat tóleýdi kózdeıtin buıryqty ázirlep, qabyldady. Qazaqstandyqtar aǵymdaǵy jyldyń 20 shildesinen bastap aıdyń sońyna deıin bank kartalaryna tólem ala bastaıdy", - delingen habarlamada.

Buıryq kúshine engen kezde 5 áleýmettik topqa jatatyn azamattar alýshylar bolady. Jergilikti atqarýshy organdar qolda bar derekter negizinde azyq-túlik jáne turmystyq jıyntyq alýǵa tıisti adamdardyń tizimin jasaıdy. Sodan keıin shilde aıyna, ıaǵnı shekteý sharalarynyń qoldanylý kezeńinde alýshylarǵa somasy 2 AEK mólsherinde tólem jiberiledi.
5 áleýmettik topqa:

– ataýly áleýmettik kómek alýshylar qatarynan 6 jastan 18 jasqa deıingi balalar;

– medısınalyq-áleýmettik mekemelerde turaqty turatyn múgedekterdi qospaǵanda, 16 jasqa deıingi múgedek balalar;

– medısınalyq-áleýmettik mekemelerde turaqty turatyn múgedekterdi qospaǵanda, barlyq jastaǵy I, II, III toptaǵy múgedekter;

– múgedek bala tárbıelep otyrǵan adamdar;

– jumyspen qamtý máseleleri jónindegi jergilikti organda tirkelgen jumyssyz azamattar jatady.

Buǵan deıin habarlanǵandaı, koronavırýstyq ınfeksııany juqtyrý qaýpin azaıtý maqsatynda adamdardyń tikeleı baılanysyn boldyrmaý úshin azyq-túlik jáne turmystyq jıyntyqtar 2 AEK-ten kem bolmaıtyn mólsherde alýshylardyń bank kartalaryna aýdarylǵan tólemge aýystyryldy.

Aǵymdaǵy jyldyń naýryz aıynan mamyr aıyna deıin bul tólemder jalpy somasy 13,5 mlrd teńgege 1 mln adamǵa eseptelgen.

Esterińizge sala keteıik, 14 shildede QR premer-mınıstri Asqar Mamın Úkimet otyrysynda QR Eńbek jáne halyqty áleýmettik qorǵaý mınıstrligine qazaqstandyqtarǵa azyq-túlik jáne turmystyq jıyntyqtar úshin aqshalaı qarajat tóleýdi bastaýdy tapsyrǵan bolatyn.

Buǵan deıin QR Prezıdenti Qasym-Jomart Toqaev koronovırýstyq ınfeksııanyń taralýyna jol bermeý sharalaryn kúsheıtýdi tapsyrdy. Tabyssyz qalǵan qazaqstandyqtardy qoldaý úshin járdemaqylar, birjolǵy tólemder tólendi, onyń ishinde azyq-túlik jáne turmystyq jıyntyqtar berildi.

 

Sońǵy jańalyqtar

Uqsas jańalyqtar