Álemde koronavırýs juqtyrǵandar sany birneshe kúnnen beri rekord jańartyp keledi. Jalpy, planeta boıynsha bul ınfeksııadan qaıtys bolǵandar 600 myńnan asyp, mıllıondaǵan adam aýrýhanaǵa tústi.
Vashıngtondaǵy Djons Hopkıns ýnıverstetiniń málimetinshe, pandemııa bastalǵaly Covid-19 dıagnozy jer sharynda 14 jarym mıllıonǵa jýyq adamǵa qoıylyp, 606 myńnan astamy qaıtys bolǵan.
Eń qıyn jaǵdaı – AQSh-ta. Munda qaýipti ınfeksııa táýligine keminde 60 myń adamnan tabylyp jatyr. Naýqastardyń jalpy sany 3 mıllıon 700 myńnan asyp, 140 myńy qaıtys boldy.
Pandemııanyń kúsheıgeni sonsha, Florıdanyń toǵyz gospıtalinde oryn qalmaǵan. Sondyqtan, jergilikti basshylar halyqty meılinshe saq bolýǵa shaqyryp otyr.
Izraılde narazylyq kúsheıip otyr. Polısııamen qaqtyǵysqa ulasqan manıfestasııalarǵa medbıkeler de qatysyp jatyr. Olardyń aıtýynsha, aýrýhanalarda koronavırýs juqtyrǵandardy emdeıtin dárigerler jetispeı jatyr jáne de jumys isteýge jaǵdaı jasalmaǵan.
Fransııada maskany dúkenderde, restorandarda, bankterde taǵyp júrý mindetteldi. Buǵan deıin onsyz qoǵamdyq kólikke kirýge tyıym salynǵan edi. Jańa erejeni buzǵandar 135 eýro aıyppul tóleıdi.
Al Efıopııada koronavırýs kesirinen suranys tómendegendikten, mamyrdyń basynan maýsymǵa deıin 650 myń qus óltirildi. О́ıtkeni, karantınge baılanysty otelder men restorandar taýyq, úırek etin burynǵydaı satyp almaıtyn bolǵan.
Úrimshide koronavırýs juqtyrǵandar 47-ge jetti. Sondyqtan, 3 jarym mıllıon halqy bar qalada barlyq turǵyndar kvartaldary karantınge jabylyp, úıden shyǵýǵa tyıym salynyp, saýda ortalyqtary men qonaq úıler qyzmetin toqtatty. Sonymen qatar, jańa ınfeksııa Qashǵarda da tabylyp otyr.
