Eger oqyrman esinde bolsa, maýsym aıynyń sońyndaǵy dári-dármekter tapshylyǵyna baılanysty Almaty ákimi Baqytjan Saǵyntaevtyń sheshimimen indetke qarsy preparattardy kótere satyp alýdy qarjylandyrý úshin paıyzsyz 5 mlrd teńge bólingen edi. Budan basqa, kovıdti stasıonarlardy dári-dármek preparattarymen qamtamasyz etý maqsatynda rezervtik qor qurý úshin taǵy 5 mlrd teńge bólindi. Qazirgi kezde preparattardyń jartyjyldyq qoryn jasaýda jantalas jumystar júrip jatyr desek te bolady.
Delıden jetkizilgen dári-dármekterde leginde enaksoparın, geparın, qabynýǵa, bakterııalarǵa qarsy – ofloksasın, prednızalon, deksametazon, seftrıakson, meropenem, parasetamol, vırýsqa qarsy – oseltamıvır bar.
"О́tken jumadan bastap dári-dármekterge degen suranystyń tómendegeni, uzaq kezektiń azaıǵany baıqalady. Jalpy, jaǵdaı ońalyp keledi. Turaqtylyq qory arqyly dárihanalarǵa preparattardy jetkizýmen qatar, biz kovıdti gospıtalderdi dári-dármektermen jedel qamtamasyz etý úshin rezervtik qordy jasap jatyrmyz. Dári-dármekterdiń jartyjyldyq qory farmaseptıkalyq kompanııalardyń qoımalarynda saqtalady, qajet bolǵan kezde bul preparattar stasıonarlarǵa bólinedi", – deıdi Almaty ákimdiginiń qalany dári-dármek preparattarymen qamtamasyz etý jónindegi úılestirýshisi Zańǵar Sálimbaev.
Onyń keltirgen málimetteri boıynsha, Almatyǵa 23 shildede Túrkııadan "Kleksan" preparaty jetkiziledi. Jetkizýshi bul preparattyń shamamen 40 myń birligin ákeletin bolady. 31 shildege deıin qosymsha taǵy 150 myń birliktegi kleksan jetkizý josparlanǵan. Jalpy, aldaǵy aptada 300 myńǵa jýyq antıkogýlıant tasymaldanady.
Bul – qalaǵa 10 shildeden bastap qajetti dári-dármekterdi jetkizgen jetinshi reıs. Shildeniń sońyna deıin taǵy eki reıs keledi dep kútilýde. Qalaǵa jetkizilgen dári-dármekterdiń jalpy kólemi shamamen 7,5 mln qaptama. Kedendik rásimdeýden soń preparattar qala dárihanalaryna bólinetin bolady.
Qala ákimdigi tarapynan dári-dármek júkteriniń jedel rásimdelýi úshin pármendi sharalar júzege asýda. MKD-niń Almaty qalasy boıynsha "Jetisý" Keden postysynyń basshysy Talǵat Jańbyrbaev óziniń sózinde elimizge kelip jetken medısınalyq zattary bar gýmanıtarlyq jáne kommersııalyq júkterdi rásimdeý ýaqytynyń edáýir qysqarǵanyn atap ótti.
"Gýmanıtarlyq júkter kedendik tólemdersiz, tez arada rásimdelýde. Rásimdeý ýaqyty 5-10 mınýt. Farmkompanııalardyń kommersııalyq partııalaryn rásimdeýge 10-20 mınýt ketedi. Aıta keterligi, biz qazir táýliktik jumys rejımine kóshtik. Buryn túnde kelgen júk tańerteńgisin rásimdeletin. Biz qazir kelgen júkti der kezinde rásimdep, kúndiz de, túnde de damyl tappaı, jumys jasaýdamyz. Biz únemi baılanystamyz, óıtkeni ómirlik mańyzy bar júk bir mınýtqa da keshikpeýi tıis", – deıdi Talǵat Jańbyrbaev.
ALMATY
