Máselen, elimizde asa qaýipti qylmyskerdi qolǵa túsirgen taǵy jeti qyzmetker marapattaldy. Degenmen, olardyń ishinde Baqytjan Bákirovtiń erligi erekshe atap ótýge turarlyq. Al osyndaı abyroıǵa bólenip jatqan polısııa qyzmetkerleri muny batyrlyqqa balamaıdy. Bul olar úshin kádimgi jumys, qylmyskerdi ustaý – mindet.
Osy arada eske sala ketý kerek, bıyl 11 shildede 36 jastaǵy almatylyq polısııa qyzmetkeri Baqytjan Bákirov qylmyskerdi ustaımyn dep bıik úıdiń 13-qabatynan sekirgen. Osylaısha, Baqytjan asa aýyr qylmysty jedel áshkerelep, kámeletke tolmaǵan adamdy tonaý men zorlaý oqıǵasyna qatysy bar kúdiktini ustaǵan edi.
Ekibastuzdan kelgen 1989 jylǵy Sh. esimdi azamat ózi kózdep, kiltin taýyp kirgen úıden asa qomaqty qarajatty qaltasyna basqany az kórinse kerek, budan keıin de asa aýyr qylmysqa barǵan. Ol tórt jasar bala men 15 jastaǵy qyz turatyn úıge kirip, 17 myń AQSh dollaryn urlap, qyzǵa zorlyq-zombylyq kórsetken. Polısııa departamenti osy qylmysqa baılanysty arnaıy jospar quryp, onyń qaıda jasyrynǵanyn anyqtaıdy. Kúdikti Almaty qalasyndaǵy ál-Farabı dańǵylynda ornalasqan turǵynúılerdiń biriniń 13-qabatyndaǵy páterde boı tasalap jatqan.
Qylmysker qolǵa túsirý barysynda, árıne sytylyp ketýge jantalasyp, ashyq terezeden sekirip ketken. Onyń sońynan polısııa qyzmetkeri de sekirgen. Ekeýi de bir qabat tómen ornalasqan terrasaǵa qulap, polısııa maıory B.Bákirov aıaǵynyń synǵanyna qaramastan, kúdiktiniń qashyp ketýine jol bermedi. Azǵyn der kezinde aıǵaǵymen tutqyndaldy.
«Qylmysker qasha jónelgen kezde men de sońynan qýdym. Ol bólmelerdiń birine kirip, ashyq terezeden sekirdi. Basty maqsat – qýyp jetý bolǵandyqtan, maǵan onyń sońynan sekirýge týra keldi», dep túsindirdi bul áreketin B.Bákirov.
Quqyq qorǵaý qyzmetkerleri qylmyskerdiń qaıda jasyrynǵanyn anyqtaǵannan keıin, páter ıesimen kelisip, qurylysshylardyń kıimimen tómengi qabatta sý aǵyp jatyr degen jeleýmen ol tyǵylǵan páterge kiredi. «Qurylysshylar» «sýy aǵyp jatqan krandy» izdep jatqan kezde azǵyn ózine bir qaýiptiń kelgenin sezip, qashýǵa umtylady.
Ári qaraıǵy sıýjet joǵaryda baıandaǵanymyzdaı. Dál osyndaı taǵdyrsheshti, asa qaýipti sátte polısııa qyzmetkerine sporttyq mashyǵy, túrli jarystardyń júldegeri atandyrǵan daıyndyǵy kómektesti.
– Men óz isine adal polısııa qyzmetkeri bolýǵa ant bergenmin!.. Munsyz polısııaǵa kim senedi?! Biz tórt kún boıy qylmyskerdiń izine túsýmen boldyq. Al qorlyq kórgen qyzdyń anasy azǵyndy qashan ustaıtynymyzdy bilý úshin kún saıyn habarlasyp turdy. Biz ony ustap, quryqqa túsirgenimizge tolyq kózim jetken kezde, kózimnen jas yrshyp ketti, – deıdi Baqytjan Bákirov.
Qysqasy, beıbit ómirde «Betmen» bolǵan B.Bákirov osyndaı kózsiz erligi úshin Ishki ister mınıstrliginiń «Quqyq tártibin qamtamasyz etýde qosqan úlesi úshin» medalimen marapattaldy. Bul marapatty oǵan Almaty qalalyq Polısııa departamentiniń bastyǵy Qanat Taımerdenov tabystady.
– Búgin bizdiń áriptesimiz Baqytjan Bákirov Ishki ister mınıstri Erlan Turǵymbaevtyń sheshimi boıynsha «Quqyq tártibin qamtamasyz etýde qosqan úlesi úshin» medalimen marapattaldy. Osy maqsatpen biz onyń úıine baryp, densaýlyǵyn bilip, tezirek saýyǵyp ketýin tiledik. Maıor Baqytjan Bákirovke rızashylyǵymdy bildiremin. Osyndaı laıyqty uldy tárbıelep ósirgen ata-anasyna erekshe alǵys aıtamyn! – dedi Qanat Taımerdenov.
Sonymen qatar mınıstrdiń jáne Polısııa departamenti basshysynyń marapaty Túrksib aýdandyq PB janyndaǵy polısııa bóliminiń taǵy jeti qyzmetkerine berildi. Olardyń sheber áreketi arqasynda balany qorlaǵan asa qaýipti qylmyskerdiń joly kesilip, endigi jerde laıyqty jazasyn alady.
ALMATY
