Kúni keshe ǵana saılanǵan Prezıdentimizdiń qandaı azamat ekenin jurt jaqsy biledi.
Ol kisiniń el basqarý kezeńimen asa kúrdeli oqıǵalar tuspa-tus keldi. Aınalasy bir jyldyń ishinde elimizde neler bolmady?!
Aldymen Arys qalasynda qoıma jaryldy, ushaq apatqa ushyrady, Maqtaaraldy tasqyn sý basty, al arty álemdi álsiretken koronavırýs indetine alyp keldi. Egemendi elimizdiń tarıhynda bolmaǵan tótenshe jaǵdaıǵa tap boldyq.
Osynyń bári Prezıdentimizge ońaı tıip jatqan joq. Ol da et pen súıekten jaralǵan adam. Ony túsinýimiz kerek. Taǵdyr synaǵy shyǵar. «Jaratýshy synaqty kótere alatyn adamyna ǵana beredi», deıdi. Elimiz úshin janymen shyryldap, bar múmkindikterdi jasaýda.
Ony barlyǵymyz kórip-bilip otyrmyz.
Zamanaýı bilimi kemel, alysty boljaı alatyn halyqaralyq deńgeıdegi basshy. Eń aldymen, taza adam. Muny basa aıtý qajet.
Al tazalyq – qandaı qoǵamdy bolmasyn tyǵyryqtan alyp shyǵar shýaqty jol.
Mine, osyndaı kúrdeli jaǵdaıda eldi qıyndyqtan alyp shyǵatyn myqty atqarýshylar, qazirgi tilmen aıtqanda Prezıdenttiń komandasy bolýy kerek. Olar elge shyn berilgen, janashyr jandar bolýy tıis.
Biraq atqarýshy bılik osaldyq tanytyp otyr. Kúrdeli kezde kúre jol taba almaı abdyrap qaldy. Úkimettiń uıytqy bola almaýynan qatelikter ketti. Bul eski júıeniń dármensizdigin dáleldep berdi.
Prezıdenttiń óz sózimen aıtqanda: «Bizge memlekettik basqarýdy qaıta jasaqtaý qajet. Jańasha baǵytta oılaı alatyn jańa oryndaýshylarǵa múmkindik beriledi. Olar – bilimdi, belsendi, isker jáne adal azamattar».
Qazir kópshilik Úkimet pen bıliktiń barlyq qurylymdarynda tez arada ózgerister engizýdi talap etýde. Durys! Biraq muny tez jasaı salý ońaı sharýa emes. Memlekettik qyzmette uzaq jyldar jumys istegen adam retinde aıtatynym, bizde tek teorııalyq qana emes, sonymen birge, praktıkalyq tájirıbesi bar daıyn kadrlardyń sany óte az. Eger adam ádemi sóılese, ol onyń kez kelgen salany basqaryp kete alatyndyǵyn bildirmeıdi. Tipti basshylyq laýazymdardy aıtpaǵannyń ózinde, mınıstrlikte qarapaıym qyzmetke tıisti maman tabý keıde óte qıyn.
Degenmen qalaı bolǵan jaǵdaıda da memlekettik basqarý júıesin qaıta qurý qajet jáne solaı bolady. Ol júıe ádil jáne ashyq bolýy kerek. Bul jumysty Prezıdentimiz qazirdiń ózinde bastap ketti.
Bizdiń eldiń ekonomıkasy kóbinese úlken bıznesmender men alpaýyt olıgarhtarǵa negizdelgen. Olardyń kópshiligi ózderiniń múddelerin qorǵaıtyny belgili. Eger ózge damyǵan elderdegideı el ekonomıkasy shaǵyn jáne orta bıznestiń úlesinde bolǵanda, jaǵdaı múlde basqasha bolar edi. Al endi álgi alpaýyttardan qandaı da bir kúrdeli ózgeristerdi talap eter bolsaq, onda olar ushaqtaryna minip, shetel asyp ketpeıtinine kim kepil?
Ashyǵyn aıtý kerek, qazirgi naryqtyq zamanda ondaı iri ınvestorlarǵa barlyq memleketter talasýǵa bar. Al osydan keıin el ekonomıkasy bir kúnniń ishinde quldyrap shyǵa kelmeı me? Sondyqtan da, araǵa altyn kópir sala otyryp, bir jaqty jaǵdaı men elge utymdy sheshim jasaý el Prezıdentiniń basty mindeti ekenin túsinýimiz qajet.
Bul jumysta Prezıdentimizge kúsh pen qýat, jalyndy jiger beretin halyqtyń ózine degen rııasyz senimi men Elbasynyń qoldaýy. Sondyqtan biz bárimiz bir jaǵadan bas, bir jeńnen qol shyǵara otyryp, jaqsy nıetpen basshymyzdy el bolyp qoldap, jigerlendirip demeý bergenimiz abzal.
Keıbireýimiz óz otbasymyzdy basqara almaı otyryp, memleket basshysyna qısynsyz sózder aıtamyz.
Prezıdent – bir ǵana qazaqty emes, mıllıondardan turatyn qazaq elin basqaryp otyrǵan tulǵa. Osyny esten shyǵarmasaq eken.
Árıne qoǵamymyzda ózgerister bolý kerek. Bolady da. Qazaqstan damyǵan demokratııalyq memleketke aınalýy haq. Biraq biz oǵan revolıýsııalyq jolmen emes, evolıýsııalyq jolmen kelýimiz kerek.
Egerde aıtyp otyrǵan biteý jaranyń beti ashylyp ketse, budan da qıyn, budan da kúrdeli kezeńge tap bolarymyz anyq. Sarapshylardyń baǵamdaýynsha, eger de Qazaqstanda jaǵdaı ýshyǵyp keter bolsa, elimiz kem degende 25 jylǵa keıin sheginedi. Demek, jaqsy ómir de, biz armandaǵan ádemi zaman da joq bolady. Al bılik dármensizdikke urynsa, bizdi jan-jaqtan qorshap otyrǵan alpaýyt kórshilerimiz shet oblystarymyzdy bólip áketpeýine kim kepil? Bul – ashy shyndyq. Bizge, bizdiń balalarymyzǵa bul qajet pe? Árıne joq. Sondyqtan halyqtyń birligin bekem ustap, memlekettiligimizdi qalaı da nyǵaıtýymyz qajet.
«Myna zaman toı toılatyn emes, oı oılaıtyn zaman», dep Prezıdentimiz Qasym-Jomart Kemeluly atap ótken bolatyn. Túsingen adamǵa rasynda da oı salar sóz. Árqashan qazaq elinde jastarǵa aqyl beretin, eldi biriktiretin zııaly qaýym ókilderi bolatyn.
El basyna kún týǵan ýaqytta, tán aýyrýymen birge jany kúızelgen eldi sabyrǵa shaqyryp, salıqaly sóz aıtatyn zııaly qaýym, ǵalymdar, óner qaıratkerleri emes pe edi. Jar astynda jaý baryn alystan boljap, elge aqyl aıtatyn sol zııalylarymyz osyndaıda el shetine shyǵyp, el basqarý jolynda salıqaly sóz aıtsa deımin. Memleket basshysynyń júrgizip otyrǵan zamanaýı keshendi basqarý jolyn halyqqa túsindirýge atsalysatyn el aǵalary kóbeıse ıgi.
Qıyn-qystaý zamannan elimiz aman shyǵyp damýdyń dańǵyl jolynda bolaıyq, aǵaıyn! Denimiz saý, basymyz aman, júregimiz taza bolsyn!
Aqylbek KÚRIShBAEV,
UǴA akademıgi,
S.Seıfýllın atyndaǵy Qazaq agrotehnıkalyq ýnıversıtetiniń rektory
