Áýlıeatalyq áleýmetke tıisti qoldaý kórsetilýde

Jýyrda «Qazfosfat» JShS bas dırektory, Qazaqstannyń Eńbek Eri Muqash Eskendirov jeke qarajatynyń esebinen árqaısysynyń quny 580 myń teńge turatyn 10 jasandy tynys alý apparattaryn satyp alyp, oblystyq aýrýhanaǵa tapsyrǵan bolatyn. Sonymen qatar búginde óńirde muqtaj otbasylarǵa pnevmonııa men koronavırýsqa qarsy dári-dármekter taratylýda. Turǵyndarǵa qajetti myń­nan astam medısınalyq paket qam­tylǵan. Al Taraz qalasynyń ákimi Aıtqazy Qarabalaevtyń aı­týyn­­sha, ákim­diktiń qoldaýymen jáne «Sýper-Farm» jergilikti kásipornynyń qarjy­lan­dy­rýymen qaladaǵy 9 emhanaǵa 560 dári-dármek paketi jetkizilgen. Bir ǵana №5 em­hanaǵa jetkizilgen dári-dármektiń jalpy quny 27 mln teńgeni quraıdy. Jetkizilgen dári-dármekter qata­rynda ksarelto, oseltamıvır akrı­hın, zıtroks sekildi qymbat prepa­rat­tar da bar. Keıbiriniń baǵasy 7 myń teńgeden bastalady. Sondaı-aq taratylǵan paketterde shprıster, sıstemalar, spırttik súlgiler, koronavırýs ınfeksııasy men pnevmonııany emdeýge arnalǵan antıbıotıkter, dárýmender, antıpıretıkalyq jáne qabynýǵa qarsy dáriler bar. Bir paket bir aptalyq emdeý kýrsyna arnalǵan. О́zindik quny boıynsha baǵasy 7 825 teńgeni quraıdy. Budan bólek, qala ákimdiginiń tarapynan juqpaly aýrýlar aýrýhanasynda em alyp jatqan 250 naýqasqa ystyq tamaq uıymdastyrylǵan. Oblystyq kópbeıindi balalar aýrýhanasy men №1 qalalyq aýrýhanasynda em alyp jatqan naýqastar men medısına qyzmetkerlerine de ystyq tamaq pen ózge de qajetti kómekter kórsetilýde. Al «Rýhanı jańǵyrý» jobalyq ofısi bastamashy bolǵan «Qymyzmuryndyq» sharasyna tarazdyq kásipkerler de óz úlesin qosýda. Qaýipti indetti juqtyrǵandar em alyp jatqan oblystyq kópbeıindi balalar aýrýhanasyna 100 lıtr qymyz jetkizilgen. Bul úrdis áli de jalǵasyn tabady.

Sonymen qatar «Taraz» áleý­met­tik-kásipkerlik korporasııasy» AQ jáne «Atameken» óńirlik kásipkerler palatasynyń qoldaýymen qosymsha 520 dári-dármek paketi satyp alynǵan. «Atameken» óńirlik kásipkerler palatasynyń dırektory Samat Qosalıevtiń aıtýynsha, óńirdegi kásipkerlerdiń qoldaýymen 350 mln teńgege jýyq qarajat jınalǵan. Oǵan jasandy tynys alý apparattary jáne qajetti dári-dármekter satyp alynyp, oblystyń barlyq aýdanyna tegin taratylǵan. О́ńirde bastaý alǵan «Jaqsylyq jarshysy» aksııasy áli de jalǵasyn tabatyn bolady. Sondaı-aq «Taraz» áleýmettik-kásipkerlik korporasııasy» AQ basqarma tóraǵasy Oljas Qarjaýov oblystaǵy qaıyrymdylyq aksııasyna kásipkerlerdiń biraýyzdan atsalysqanyn jetkizdi. Bul qaıyrym­dy­lyq aksııasyna atalǵan eki mekeme muryndyq bolǵan. Birinshi arnaıy top oblystaǵy barlyq aýdandy aralap shy­­ǵyp­ty. Áýelgi kezekte qajetti zattar tizimdelgen eken. Máselen, Baızaq aýda­nyna seftrıakson, zıtroks, asetıl­sa­lısıl, antıgrıppın, parasetamol jáne glıýkoza sııaqty qajetti dáriler jet­ki­zil­gen.

«Biz óńirdegi barlyq aýdandar men aýyl­dardy aralap shyqtyq. Antı­vı­rýs­tyq, ystyqty túsiretin dárilerdi jetkizdik. Bul sharaǵa atsalysqan bar­lyq kásipkerlerge alǵys aıtqym keledi. Endi oblys ákimi Berdibek Saparbaev­tyń tapsyrmasymen óńirdiń jedel járdem avtokólikterin jańartýdy qolǵa almaqpyz», deıdi O.Qarjaýov. Taǵy bir aıta keterligi, qaıyrymdylyq aksııasyna «Taraz» áleýmettik-kásipkerlik korporasııasy men «Atameken» óńirlik kásipkerler palatasy oblystaǵy dári­ha­nalardan tapsyrys alyp, tur­ǵyn­darǵa arzan baǵaǵa dári-dármek ta­­ýyp berý jaǵyn qolǵa alypty. Búgingi tańda Shymkent qalasyndaǵy «Zerde» dárihanalar jelisimen atalǵan baǵytta jumystar bastalyp ketken.

Jambyl oblysy