Úkimet basshysynyń orynbasary Eraly Toǵjanov Ortalyq kommýnıkasııalar qyzmeti alańynda búginde indet juqtyrýdyń táýliktik ósimi 4 paıyzdan 1,7 paıyzǵa tómendegenin, dertten jazylǵandardyń sany 66 paıyzǵa jetkenin málimdedi.
Sondaı-aq jedel járdemdi shaqyrý sany 40 paıyzǵa, onyń ishinde koronavırýsqa baılanysty shaqyrý 52 paıyzǵa azaıdy. Aýrýhanalardaǵy jatatyn oryndardyń qoldaný deńgeıi 90 paıyzdan 40 paıyzǵa tómendep otyr. Osyǵan baılanysty jeti óńirde qosymsha 15 provızorlyq stasıonar jabyldy. Jedel járdem shaqyrǵandardyń sany 40 paıyzǵa, onyń ishinde pnevmonııa boıynsha 35 paıyzǵa tómendedi.
«Aýrýhanalar men emhanalarda bir aılyq dári-dármek qorlary quryldy. Budan basqa bólshek saýda naryǵyn qoldaý úshin shetelden 10 mln-ǵa jýyq dári-dármek Qazaqstanǵa jetkizildi. Nátıjeler – jaqsy. Degenmen bosańsýǵa eshbir negiz joq. Kerisinshe, negizgi maqsatymyz – jetken jetistikterdi ári qaraı jetildirý. Osy rette Prezıdentimizdiń tapsyrmasyna oraı, Premer-Mınıstrdiń tóraǵalyǵymen ótken Memlekettik komıssııa karantındi eki aptaǵa uzartýǵa sheshim qabyldady», dedi E.Toǵjanov.
Premer-Mınıstrdiń orynbasary karantın sharalary aıaqtalǵannan keıin birinshi kezekte jumysy jandanatyn kásipkerlik sýbektileriniń aldyn ala tizimi jasalǵanyn atap ótti. Bul – oıyn-saýyq ortalyqtary, saýda úıleri, jabyq sanattaǵy azyq-túliktik jáne azyq-túliktik emes bazarlar, balalardyń korreksııalyq kabınetteri, bilim berý ortalyqtary, balalardy damytý ortalyqtary, toptyq úıirmeler (bes baladan aspaýy kerek), balalardyń mektepke deıingi mekemeleri (kezekshi top rejiminde jumys isteýge ruqsat), sán-salondary, kosmetıkalyq qyzmet kórsetetin ortalyqtar (aldyn ala jazylý boıynsha). Aldaǵy eki aptada kásipkerliktiń osy sýbektileri kúsheıtilgen daıyndyq jumystaryn júrgizýi kerek.
Árbir nysan boıynsha sanıtarlyq rejimniń naqty sharalary qabyldanady. 5 tamyzǵa deıin Densaýlyq saqtaý mınıstrligi jumysy jandanatyn nysandarǵa qoıylatyn sanıtarlyq talaptardy ázirlep, jarııalaıdy. Ol boıynsha kásipkerlik nysandary sanıtarlyq maskalyq rejim, áleýmettik qashyqtyq, sanıtaızerler boıynsha talaptardy qatań saqtaýǵa mindetteledi.
Odan ári Densaýlyq saqtaý mınıstri Alekseı Soı ózi basqaratyn vedomstvonyń ýákiletti organdarmen birlesip, shekteý sharalaryn, onyń ishinde karantındi buzǵany úshin adamdardy ákimshilik jaýapkershilikke tartý tártibin ázirlegenin aıtty.
«Oń dınamıkaǵa, onyń ishinde koronavırýs ınfeksııasy boıynsha aýyrý men ólim-jitim kórsetkishteriniń nasharlamaýyna halyqtyń júrdim-bardym qaramaýy úlken áserin tıgizedi. Qarapaıym ǵana maska taǵý sııaqty aldyn alý sharasy aýrý qaýpin 30%-ǵa tómendetedi. Osyǵan sáıkes Densaýlyq saqtaý mınıstrligi azamattardy qoǵamdyq oryndarda árdaıym maska taǵyp júrýge mindetteıtin buıryq shyǵardy. Biz halyqaralyq tájirıbeni zerttedik. Qazaqstanda ǵana emes, birqatar shet memlekette jabyq úı-jaılarda da, ashyq aýada da mindetti túrde maska taǵý engizilgen. Mysaly, maska taǵýdy mindetteý búginde AQSh-tyń 43 shtatynda, Polshada, Aýstralııada, Slovakııada, Vetnamda qarastyrylǵan. Infeksııanyń taralýyn azaıtýdaǵy maskanyń tıimdiligi týraly kóptegen pikirtalastar týyndaıdy. Nátıjesinde báribir maskanyń paıdasy baryna kóz jetkizemiz. Ǵalymdar áleýmettik araqashyqtyqqa qosa halyqtyń maskany udaıy qoldanýy pandemııa kezinde jaǵdaıdy baqylaýda ustaýǵa septigin tıgizedi degen toqtamǵa keldi», dedi A.Soı.
Mindetti túrde maska taǵý týraly buıryq resmı jarııalanǵan kúnnen bastap kúshine enedi jáne normalardy oryndamaǵan jeke jáne zańdy tulǵalarǵa aıyppul salynady.
Baspasóz jıynynda Premer-Mınıstrdiń orynbasary Eraly Toǵjanov jýrnalısterdiń saýalyna oraı karantınniń merzimi uzartylǵan eki aptada 42 500 teńgeniń jartysy tólenetinin aıtty.
«Memleket basshysy Qasym-Jomart Toqaevtyń tikeleı tapsyrmasy bar. Eki aptaǵa karantın sozyldy. Tólem beriledi. Biraq 42 500 teńgeniń jartysy 21 250 teńge tólenedi. 17 tamyzda sanıtarlyq talaptarǵa saı keletin nysandar jumysqa kirisedi. Aldaǵy eki aptada osy ashylý sharasyna daıyndyq júrgiziledi», dedi E.Toǵjanov.
