Stýdent qyzdy óltirgen Joǵarǵy sottyń burynǵy qyzmetkeri bostandyqqa shyqty. Bul týraly «Jetinshi» telearna habarlady.
Buǵan deıin №2 Esil aýdandyq soty D.Aldııarovty 1,5 jylǵa bas bostandyǵynan aıyrǵan bolatyn. Endi qalalyq sottyń jańa sheshimi boıynsha ony 1 jyl 2 aı 3 kúnge bas bostandyǵynan shektedi. Osylaısha 3-shi naýryzdan bastap temir tordyń arǵy jaǵynda ótkizgen árbir kúni eki kúnge teńelip, ol jazasyn ótep shyǵypty. Sondaı-aq sot Aldııarovqa qylmystyq atqarý júıesi qyzmetkerlerine eskertpesten qonys aýdarýǵa, qaladan shyǵýǵa jáne túngi saǵat onnan keıin kóńil kóterý oryndaryna barýǵa tıym saldy. Esterińizge sala keteıik, Darhan Aldııarov týǵan kún keshin atap ótip jatqan bir top stýdentpen sózge kelip qalyp, olarǵa óziniń ańshylyq qarýynan oq atqan edi. Jabyq esikke atylǵan oq 18 jastaǵy stýdent Merýert Qojabekovanyń keýde tusyna tıip, qyz bala sol jerde jan tapsyrǵan bolatyn.
Sottyń mundaı sheshimge kelýine taraptardyń tatýlasýy sebep bolypty. Sondaı-aq aıypker barlyq keltirilgen shyǵyndy ótegen. Onyń asyraýynda jas nárestesi bary jáne birinshi ret sotty bolyp otyrǵany da qaperge alynǵan eken.
Baqytbek Keneshuly.
