Kavasakı sındromy: Balalardyń densaýlyǵyn muqııat baqylaýdy qajet etedi

Mamyr aıynyń ortasyna taman DDU tarapynan Eýropa men Soltústik Amerıkada qabyný jaǵdaıymen aýrýhanaǵa túsken balalar dertiniń keıbir belgileri Kavasakı sındromymen sáıkes keletini, buǵan Covid-19 inde­tiniń qatysy bolýy múmkin ekeni habarlanǵan. Bul rette DDU basshysy búkil eldiń dári­gerlerin vırýs juqtyrǵan balalardaǵy qabyný belgilerin muqııat baqylaýǵa shaqyrǵan.

Apta basynda elimizdiń Den­saý­lyq saqtaý mınıstrliginiń res­mı ókili Baǵdat Qojahmetov úsh jet­kinshekte Kavasakı sındromy anyqtalǵanyn málimdedi. Aýrý­dyń bul túri baıqalǵan bala­lar Nur-Sultan, Almaty jáne Petropavl qalalarynda tirkelgen. Qazir balalardyń ahýa­ly ártúrli dárejede, elor­da­daǵy balanyń jaǵdaıy turaqty.

Sonymen qatar ótken aptada Aqtóbede KVI juqtyrǵan ba­la­larda qabyný sındromy baı­qalǵany, onyń sırek ushyraı­tyn Kavasakı aýrýyna uqsaı­tyny týraly habar tarady. Atal­ǵan óńirdiń densaýlyq saqtaý bas­qarmasynyń basshysy Samat Da­­nııa­rov Kavasakı aýrýyna shal­­dy­ǵý kúdigimen aýrýhanaǵa bes ba­la túskenin, onyń ekeýinde qa­by­­ný sındromy anyqtalǵanyn aıt­ty. Aýyrǵan eki balanyń biri 5, ekin­shisi 15 jasta eken. Olar­dyń ómir­ine qaýip tónip turǵan joq.

Búginde kúshine minip turǵan Covid-19 indeti talaı aýrýdy qoz­dy­ryp, qaýpi zoraıyp ketti. Ásirese vırýs jasy egde tartqandar men densaýlyǵy syr berip júrgenderge ájeptáýir zııanyn tıgizdi. Balalar bolsa, kóbine indettiń sımptomsyz, jeńil túrine ushyrady. Al endi KVI juqtyrǵan kishkentaılarda qabyný sındromynyń baıqala bastaýy ata-analardy aıtarlyqtaı alańdatyp qoıdy. Onyń ústine el arasynda indet endi balalarǵa tisin batyrady eken degen áńgimeniń tarap jatqanyna da biraz boldy. Osy rette Covid-19 kesirinen sımptomdary baıqalyp jatqan sırek kezdesetin Kavasakı sındromynyń qandaı aýrý ekenin halyq jete bile bermeıdi. Bul týraly bizge Pedıatrııa jáne balalar hırýrgııasy ǵylymı ortalyǵynyń basqarma tóraǵasy, medısına ǵylymdarynyń doktory Rıza Boranbaeva jan-jaqty maǵlumat ber­di.

Onyń aıtýynsha, Kavasakı aýrýy eshqandaı da juqpaly dert emes. Bul – pandemııaǵa deıin de bolǵan, biraq óte sırek kezdesetin dert. Elimizde indetke deıin atalǵan sındromǵa shaldyqqan balalar bolǵan eken, biraq jylyna ári ketse eki-úsh bala ǵana aýyrǵan. Olardyń jasy bes jasqa da jetpegen.

«KVI juqtyrǵan balalarda kezdesken belgiler Kavasakı aýrýynyń naq ózi emes. Muny Kavasakı aýrýy­nyń sımptomdary deýge bolady. Iаǵnı ýaqytsha Covid-19 indetimen qabattasqan mýltıjúıelik qabyný sındromy (MQS). Bul aýrýdyń belgileri indettiń jeńil jáne sımp­tomsyz túrine shaldyqqan balalarda baıqala bastaýda. Kavasakıge uqsas sındromnyń naǵyz Kavasakı sın­dromynan aıyrmashylyǵy – osy. Sındrom dene qyzýynyń kó­te­rilýi­nen bastalady, sol kezde jó­tel, entigý paıda bolýy múmkin. Naqty Kavasakıdiń aýrýyna uqsas belgilerdiń biri – bórtpe, tildiń, erinniń qyzarýy, alaqannyń isinýi. Sondaı-aq MQS kezinde balada konıýnktıvıt bilinip, lımfa túıinderiniń úlkeıýi múmkin. Balalar keýdesi qysylyp, júrek tusy, ishi aýyryp, qusý, júrek aıný, dıareıa sııaqty jaı­syz­dyqqa tap bolady», dedi Rıza Boranbaeva.

Jalpy balalardaǵy mýl­­tı­­júıe­lik qabyný sındromynyń klı­nıkalyq belgileri – qaltyraý, 1 táýlik nemese odan da kóp ýaqyt boıy 38 gradýs­tan joǵary dene qyz­ýy, bórtpe, konıýnktıvıt, sklerıt, lımfadenopatııa, alaqannyń, aıaqtyń isinýi, tynys alýdyń qıyn­da­ýy, asqazan-ishek joldarynyń za­qym­danýy.

«Balada Kavasakı sındromynyń belgileri baıqalǵan kezde jergilikti dárigerge nemese pedıatrǵa júginý kerek. Mundaı sındrommen balalar mindetti túrde aýrýhanaǵa jatqyzylady. Biraq ádettegi balalar aýrýhanasyna túsedi. О́ıtkeni bul sındrom bala koronavırýs juqtyryp, eki-úsh apta ótken soń, ıaǵnı jazylǵannan keıin baıqalady. Sondyqtan balalar aýrýhanasynda tolyqqandy dıagnoz ben zertteýler jasalady. Zertteýlerge bıohımııalyq qan taldaýy, gemostazdy baqylaý, koagýlogramma, ehokardıogramma, EKG, ÝDZ, keýde rentgeni nemese KT kirýi múmkin», dedi pedıatr.

Rıza Boranbaeva balalary úshin qashan da alańdaýly ata-analardyń qaperine Kavasakı sındromynyń juqpaly emes ekenin, ony emdeýge bolatynyn jáne bul aýrýdyń qaıǵy­ly jaǵdaıǵa dýshar etýi óte sırek kez­desetinin aıtty. Sondyqtan aýrý­dy tym asqyndyryp almaýy úshin sın­drom­nyń sımptomdary baıqalǵan sátten birden dárigerge qaralý kerek.

Apta basyndaǵy derek boıynsha eli­mizde naýryzdan beri 2 257 bala koronavırýs ınfeksııasyn juqtyrǵan eken. Onyń ishinde aýrýhanada jatqany – 114 bala.