Oıyn bastalmas buryn biz «Sevılıanyń» jeńiske jetý joldaryna úńilip, qandaı jaǵdaıda ǵana olardyń fınalǵa shyǵýǵa múmkindigi bar ekenin aıtqan edik: «Sońǵy 15 jylda Eýropa lıgasynyń kýbogyn bes márte jeńip alǵan «Sevılıa» bul týrnırde basty fovorıtterdiń biri. Alaıda jartylaı fınalǵa shyqqan komandalardyń barlyǵy «sen tur, men ataıyndar». Condyqtan bul joly da «nervıondyqtar» úshin aýyr synaq kútip tur. Nege aýyr synaq? Sebebi buǵan deıin olar 1/8 fınalda azýly «Roma» komandasyn 2:0 esebimen jeńdi. Shırek fınalda Anglııanyń «Výlverhempton» fýtbolshylarynan basym tústi. Endi mine olardyń jolyna MIý kedergi bolmaq. Áıtkenmen ¼ fınalda «Výlverhempton» komandasyna qurǵan taktıkasy men oıyn órnegin bul joly taǵy kórsetse, Hýlen Lopetegı shákirtteri qarsylasyn sózsiz jeńedi».
Mine, aıtqanymyz aıdaı keldi. «Sevılıa» – fınalda!
Alǵashqy mınýttarda oıyn qalaı bolar eken dep kúdiktendik. Sebebi, kezdesýdiń 7 mınýtynda «Sevılıa» qorǵaýshysy Dıego Karlos aıyp alańynyń ishinde MIý jartylaı qorǵaýshysy Reshfordtyń qaqpaǵa soqqy jasaýyna múmkindik berip, artynsha aıaǵynan shaldy. Kóp ýaqyt ótpeı beıne-baqylaý arqyly bas tóreshi Felıks Bryh 11 metrlik aıyp dobyn belgiledi. Fernandesh múlt ketken joq. Esep – 1:0, MIý alda. Osy goldan keıin «nervıondyqtar» tez esterin jıyp oıynnyń 26-mınýtynda esepti teńestirdi. Sol qaptaldan sýyrylyp shyqqan Regılon «qyzyl soıqandardyń» eki qorǵaýshysynan asyryp Sýsoǵa ádemi pas shyǵaryp berdi. Sýso oılanbastan birden sol aıaǵymen soqqy jasap, qaqpanyń oń jaq buryshyn dál kózdedi. Esep – 1:1.
Esep teńeskennen keıin qos komanda alma-kezek shabýyldarmen almasyp jatty. Sondaı qarymta shabýyldardyń birinde «nervıondyqtar» esepti eselep, bul matchtyń núktesin qoıdy. Oıynnyń 78-mınýtynda oń qaptaldan Navas aıyp alańyna áýeletip asyrǵany sol edi, oǵan birinshi bolyp jetken De Iong qaqpanyń dál ortasyna soqqy jasap, esepti 2:1-ge jetkizdi. Budan keıin MIý oıyndy óz qoldaryna alyp, qansha shabýyl jasasa da nátıje bermedi. Sebebi, oǵan «Sevılıa» qaqpashysy men qorǵaýshylary daıyn bolyp shyqty.
Bir qyzyǵy, buǵan deıin «Sevılıa» Eýropa lıgasynyń jartylaı fınalynda bes ret oınap, barlyǵynda da fınalǵa shyqqan jáne barlyǵynda da jeńiske jetken. Endi mine, qatarynan 20 matchta jeńilmegen «Sevılıa» altynshy márte Eýropa lıgasynyń fınalyna shyǵyp otyr. Al endi fınalda jeńiske jetý ózderiniń qurǵan taktıkalaryna baılanysty bolmaq.
Statıstıka:
«Sevılıa» – «Manchester Iýnaıted» 2-1
Dopty ıelik etý – 53% – 47%; soqqy – 9:20; dál soqqy – 3:8; aıyp soqqy – 16:15; buryshtama – 3:4; ofsaıd – 3:0; sary qaǵaz – 2:3; oıynshy almastyrý – 4:5.
«Sevılıa»: qaqpashy – Bono; qorǵaýshylar – Regılon, Karlos, Kýnte, Navas; jartylaı qorǵaýshylar – Hordan, Fernando, Banega; shabýylshylar – Okampos, En-Nesırı, Sýso.
«Manchester Iýnaıted»: qaqpashy – De Hea; qorǵaýshylar – Van-Bıssaka, Lındelıof, Magýaır, Ýılıams; jartylaı qorǵaýshylar – Fred, Grınvýd, Fernandesh, Pogba, Reshford; shabýylshy – Marsıal.
