Alǵashqy qarsylastar anyqtaldy

«Astana»

Bıylǵy Eýrokýbok básekesin qazaqstandyq klýbtardan ádettegideı elordanyń «Astana» komandasy bastap beredi. Elimizdiń alty dúrkin chempıony jarysty jyl saıyn Chempıondar lıgasynyń irikteýinen bastap, Eýropa lıgasynyń toptyq kezeńimen aıaqtaıtyn. Bıyl da «Astana» dodany Chempıondar lıgasynyń alǵashqy irikteý kezeńinen bastaǵaly tur. Qarsylas – «Dınamo-Brest». 60 jyldyq tarıhy bar Belarýs komandasy byltyr óz eliniń chempıony atanyp, Chempıondar lıgasyna qatysýǵa múmkindik aldy. Dese de bıylǵy birinshilikte jaǵdaılary asa máz emes. Brest fýtbolshylary osy maý­symda ótkizgen 19 oıynda 29 upaı jınap, týrnır kestesinde 9-orynda keledi. Salystyrmaly túrde klýbtyń jaǵdaıy «Astanaǵa» qaraǵanda táýir. Al eldegi epıdemııalyq jaǵdaıǵa baılanysty fýtboldan Qazaqstan chempıonaty bes aıdan beri toqtap tur. Sáıkesinshe, elorda komandasy osynsha ýaqyttan beri áli birde-bir resmı match ótkizgen joq. Al qazir Belarýs birinshiligi naǵyz qyzǵan shaǵynda, fýtbolshylar tolyq babynda deýge bolady.

«Astana» quramy byltyrǵy jylmen salystyrǵanda bıyl sál bolsyn kúsheıgen. Jyl basynda Danııanyń «Kopengagen» klýbynan kıprlik sha­býyl­shy Pıeros Sotırıý, byltyr «Qaı­sar» sapynda dop tepken armenııalyq jar­tylaı qorǵaýshy Tıgran Barsegıan, Belarýstiń «Shahterinen» Maks Ebong sekildi jańa oıynshylar keldi. Al «Dı­namo-Brest» quramynda qazaq fýt­bolyna, jankúıerlerine júzi hám aty tanys birqatar fýtbolshy bar. My­saly, komandanyń vıse-kapıtany Sergeı Kıslıak 2018 jyly Pavlodardyń «Ertis» klýbynda 16 oıyn ótkizgen. Sonymen qatar qazaq topyraǵynda týyp, Qaraǵandynyń «Shahter», Qostanaıdyń «Tobyl» quramynda oınaǵan Mıhaıl Gordeıchýk te «Dınamoda» dop tebedi. Kezinde Ýkraına quramasy men Kıevtiń «Dınamosyn» órge súıregen Artem Mılevskıı de Brest klýbynyń belsendi fýtbolshysy.

Eki komanda arasyndaǵy match 18 ta­myzda Brest qalasynda ótetin bolyp bekitildi. Jańa erejege saı kezdesý bir matchtan turady. Negizgi ýaqytta jeńim­paz anyqtalmasa, qosymsha ýaqyt jáne penaltı serııasy belgilenedi.

«Qaırat»

Jyl saıyn Eýrokýbok básekelerinde toptyq kezeńge shyǵýdy kózdeıtin «Qaı­rat» Eýropa lıgasynyń aldynda kezinde Reseıdiń SSKA klýby men Brazılııa ulttyq quramasynda ja­syndaı jarqyldaǵan shabýylshy Vagner Lavpen quramyn kúsheıtti. Dál osy fýtbolshy Eýropa lıgasynda qalaı top jarýdyń syryn biledi. О́ıtkeni Lav 2004/05 jylǵy maýsymda SSKA-men ÝEFA kýbogynda jeńimpaz atanǵan edi.

Eýropa lıgasynyń alǵashqy irikteý kezeńindegi «Qaırattyń» qarsylasyna toqtalsaq. Almaty klýbynyń birinshi kezeńde Erevannyń «Noa» komandasymen kezdesedi. 2017 jyly qurylǵan klýb alǵashynda «Arsah» dep atalǵan. 2019 jyldyń jazynan bastap klýbtyń aty «Noa» bolyp ózgerip, sol jyly Armenııa chempıonatynda ekinshi orynǵa taban tiredi. Sóıtip «Noa» tarıhta birinshi ret Eýropa lıgasynda baq synaýǵa múmkindik aldy.

«Noa» klýbynyń oıynshylary «Qaırat» fýtbolshylaryna qaraǵanda oıyn tájirıbesi de, fızıkalyq múm­kin­digi de jetkilikti. 9 tamyzda «Noa» Arme­nııa Sýperkýbogynda «Ararat-Arme­nııa» komandasymen kezdesip, 120 mınýt­qa sozylǵan oıynda 2:1 esebimen jeńis­ke jetti. Sonymen qatar atalǵan komanda shilde aıynda tórt kezdesý ótkizip, úsheýinde qarsylastarynan basym túsken. «Qaıratqa» qarsy ótetin oıynǵa deıin Armenııa komandasy chempıonatta eki match ótkizedi. «Qaırat» ta eki kezdesý ótkizip úlgeredi, biraq fýtbolshylardyń sporttyq babyna ený úshin kem degende 5-6 oıyn kerek. Dese de eki klýb tájirıbege súıenip oınaıtyny jasyryn emes. Al tájirıbe jaǵynan basymdyq «Qaırat» fýtbolshylarynda ekeni anyq. Eki komanda arasyndaǵy báseke 27 tamyzda Almatyda ótedi.

«Ordabasy»

Keıingi jyldary Eýropa lıgasynyń turaqty qatysýshysyna aınalǵan Shym­kenttiń «Ordabasy» klýby bıylǵy irik­teýdi Rýmynııanyń «Botoshanı» klý­byna qarsy bastaıdy. 2001 jyly qurylǵan komanda óz tarıhynda ekinshi márte Eýropa lıgasynda baq synaýǵa múmkindik aldy. Eń alǵash 2015/16 jyly ekinshi irikteý kezeńinde Chehııanyń «Legııa» klýbymen kezdesip, eki oıyn qorytyndysy boıynsha 4:0 esebimen jeńilip qalǵan. 

Komandany rýmyndyq maman Ma­rıýs Kroıtorý jattyqtyrady. Ol 2010/11 jyldary Qazaqstan chempıo­na­tynda dop teýip, «Atyraý» komanda­synyń qatarynda óner kórsetken. Klýb quramynda jergilikti oıynshy­larmen qatar 12 legıoner dop tebedi. Olar­dyń ishinde – úsh fýtbolshy Aýstrııa­dan, eki fýtbolshy Argentına men Sol­tús­tik Makedonııadan. Sonymen qatar Ger­manııa, Fransııa, Horvatııa, Gresııa, já­ne Albanııadan oıynshylar bar. Klýb­tyń úzdik surmergeni horvatııalyq Mar­ko Dýgandjıch, ol 13 matchta 8 dop soqty.

Esterińizde bolsa, byltyr «Or­da­basy» klýby Eýropa lıgasynyń ekinshi irikteý kezeńinde «Mlada Boleslav» komandasynan 4:3 esebimen jeńilip qalǵan edi. Shymkent komandasynyń qu­ra­myna qarap, byltyrǵy sátsizdikten sabaq almaǵanyn baıqaýǵa bolady. Klýb qysqy jáne jazǵy transferde tek bir ǵana fýtbolshyny satyp aldy (Rýben Brıdjıdo, jartylaı qor­ǵaý­shy). Qysqy úzilis kezinde byl­tyr komandaǵa ájeptáýir eńbegi sińgen qaqpashy Dmıtrıı Nepogodov, qorǵaý­shy Ser­geı Malyı jáne shabýylshy Alek­seı Shetkın klýbtan ketti. Eki ujym arasyndaǵy tartysty kezdesýdi 27 tamyzda tamashalaımyz.