Shildeniń 5-nen bastalǵan reıdtik is-sharalar barysynda kúni búginge deıin oblysta 1688 karantındik rejim talaptarynyń buzylýy anyqtaldy, onyń ishinde jeke tulǵalar – 1343, zańdy tulǵalar – 325, atap aıtqanda, kafe, restoran, býkmekerlik keńseler, túngi klýbtarǵa qatysty – 46 derek, saýna, sulýlyq salondaryna qatysty – bes, otbasylyq jıyndar – 35, dúken, saýda oryndaryna qatysty – 154, betperdelerge qatysty – 196.
Karantın rejimin buzý dereginiń myńǵa jýyǵy Atyraý qalasynda tirkelgen. Mysaly, 12 tamyz túngi saǵat 03.30 shamasynda Sydyqov kóshesindegi meıramhanada týǵan kún toılanǵan. 14 tamyz kúni qaladaǵy Gýmarov kóshesindegi kafeniń jumys jasap, adamdardy qabyldaǵany anyqtaldy. Bul kúni Azattyq dańǵyly boıyndaǵy "Gúlder" dúkeni jumys jasap turǵan, 14 tamyz Qulsary qalasynda saǵat 22.00 shamasynda azyq-túlik dúkeni shektelgen ýaqyttan tys saýda-sattyq jasaǵan.
Qyzylqoǵa aýdanynyń Mııaly aýylynyń turǵyny karantın rejımine qaramastan, meken jaıynda 40 adammen ulynyń úılený toıyn jasaǵan. Karantın rejimin buzǵany úshin úı ıesine tıisti qujattar jınaqtalyp, Qyzylqoǵa aýdandyq taýarlar men kórsetiletin qyzmetterdiń sapasy men qaýipsizdigin baqylaý bólimine joldandy.
15 tamyz Beıbarys dańǵylynda ornalaskan kottedjde 10-13 adam jınalyp týǵan kún toılaǵan. Atyraý oblysy Bas memlekettik sanıtarlyq dárigeriniń Qaýlysynda kórsetilgen karantın talaptaryn oryndamaǵandarǵa qatysty jınaqtalǵan is-qujattar tıisti sheshim qabyldaý úshin Atyraý qalalyq taýarlar men qyzmetterdiń sapasy men qaýipsizdigin baqylaý basqarmasyna joldandy.
Atyraý oblysynda 17 tamyzdan bastap karantın rejimi jeńildetilgenmen, shekteý sharalary 31 tamyzǵa deıin uzartyldy.
Atyraý oblysynyń polıseıleri azamattardan karantın rejımine barynsha túsinistik tanytyp, saqtyq sharalaryn oryndaýǵa shaqyrady.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.
