Ol ortalyq aýdandyq aýrýhana men jergilikti dárihanalarda pandemııamen kúresý úshin dári-dármekterdiń bar-joǵyn tekserdi. Atalǵan aýdanda koronavırýs juqtyrǵan naýqastardyń barlyǵy emdelip shyqqanyn atap ótken jón. Sondaı-aq senator Qaratóbe aýylyndaǵy 67 turǵyn úıdiń qurylysyn tekserdi. Qoljetimdi turǵyn úı memlekettik baǵdarlama boıynsha salynýda jáne bul munda qolǵa alynǵan jalǵyz ǵana joba emes. Ákimdik taǵy 83 jeke úıden turatyn turǵyn alabynyń qurylysyn maquldady. Qazirgi tańda jumysshylar munda ınjenerlik jelilerdi tartýda. Senator memlekettik baǵdarlamalardyń iske asyrylýyn qoǵamdyq baqylaýdyń mańyzdylyǵyn jáne pandemııa kezinde azamattardyń ózekti áleýmettik problemalaryn jedel sheshý qajettigin atap ótti.
* * *
Senat depýtattary N.Júsip pen D.Nóketaeva Almaty oblysynyń birqatar aýdanyna bardy. Olar kóppáterli úılerdiń qurylysy, avtomobıl joldary, mektepterdi jóndeý, tarıhı eskertkishter men mádenıet nysandaryn qalpyna keltirý jumystaryn tekserýde.
Raıymbek aýdanynyń ákimi senatorlarǵa «7-20-25» memlekettik baǵdarlamasy boıynsha júrgizilip jatqan úılerdiń qurylysy týraly aıtyp berdi. Sonymen qatar depýtattar kelesi jyly 90 jyldyq mereıtoıy atap ótiletin ataqty aqyn Muqaǵalı Maqataevtyń kishi Otany – Qarasaz aýylynda bolyp, shekara zastavasyna da baryp, ótken sessııadaǵy zańnamalyq ózgerister men senatorlardyń zańnamalyq bastamalary týraly aqparat berdi.
Depýtattar Memleket basshysynyń tapsyrmalaryn zańnamalyq qamtamasyz etý jumystary týraly aıtyp, azamattarmen koronavırýs ınfeksııasynyń taralýyna jol bermeý baǵytyndaǵy Úkimet qabyldaǵan sharalardyń jáne halyqtyń osal toptaryn qoldaý tetikteriniń tıimdiligin talqylady. Senatorlar qazirgideı jaýapty ýaqytta memlekettik organdar jurtshylyqtyń qatysýymen dári-dármekterdiń, azyq-túlik ónimderiniń baǵasyn qatań baqylap, KVI-men kúresýge bólingen bıýdjet qarajatynyń tıimdi jumsalýyn qadaǵalaýy qajet ekenin atap ótti.
* * *
Senat depýtattary N.Beknazarov pen A.Qapbarova Shymkent qalasyndaǵy farmasevtıkalyq kompanııanyń ókilderimen kezdesti.
Is-shara barysynda olar medısınalyq mekemelerdiń jáne provızorlyq ortalyqtardyń qyzmetkerlerin dári-dármekpen, sondaı-aq qorǵaný buıymdarymen qamtamasyz etý máselesin talqylady. Depýtattar óńirdegi ahýalǵa monıtorıng júrgizý kezinde Shymkent qalasyndaǵy 60 medısınalyq mekemeniń dári-dármek pen medısınalyq buıymdarǵa tapsyrys berý maqsatymen osy jyl úshin 465 kelisimshart jasasqany anyqtaldy. Onyń jalpy quny qosymsha ótinishterdi birge eseptegende 6,9 mlrd teńgeni quraıdy. Qazirdiń ózinde jetkizýshi tarap 4,15 mlrd teńgeniń medıkamentin jetkizgen.
Osyǵan oraı senatorlar farmasevtıkalyq habtyń qoımasyn arnaıy baryp tekserdi. Bul jerden dári-dármekter Shymkent shaharymen birge Túrkistan, Qyzylorda jáne Taraz qalalaryna da jetkiziledi. Tekseris kezinde depýtattar qoımada medısınalyq preparattar men basqa da qajetti buıymdardyń eki aılyq qory bar ekenine kóz jetkizdi. Qyrkúıek aıynda taǵy da qosymsha medıkamentter jetkiziledi dep josparlanyp otyr.
Farmasevt mamandar senatorlarǵa osy saladaǵy túıtkilder jóninde aıtyp, Shymkentte Ulttyq medısınalyq ónimder men qyzmetterdi saraptaý jáne sertıfıkattaý ortalyǵynyń fılıalyn ashý máselesin kóterdi. Qazirgi tańda olar saraptama júrgizý úshin ózge qalalardaǵy mamandarǵa júginýge májbúr. Munyń ózi aıtarlyqtaı ýaqyt alatyny belgili. Sonyń saldarynan pandemııa kezinde dári-dármek jetkizýde máseleler týyndaǵan. Osyǵan oraı shymkenttik farmasevter atalǵan ortalyq qalanyń ózinde bolsa, saraptaýlardy jedel júrgizýge jáne qajetti preparattarmen qysqa merzimde qamtamasyz etýge jol ashylatynyn jetkizdi.
Sonymen qatar senatorlar Qoǵamdyq keńestiń ókilderimen kezdesip, Shymqalada medısına salasynyń damýyna tyń serpin beretin basymdyqtardy pysyqtady.
