Búgin Álıhan Bókeıhan atyndaǵy №76 mektep-lıseıde BAQ ókilderine arnalǵan press-týr uıymdastyryldy. Jýrnalıster mekteptiń kezekshi synypty qabyldaýǵa daıyndyq barysymen tanysty. Shara barysynda mektep dırektory Sapýra Týlekova №76 mektep-lıseıde 32 kezekshi synyp qurylǵanyn atap ótti.
"Bul synyptarda bala sany 15-ten aspaıdy. Aptasyna úsh kún oflaın, qalǵan eki kún qashyqtan oqıdy. Sabaqtyń uzaqtyǵy 40 mın, kúnine 3-4 sabaq ótedi. "Bir synyp – bir muǵalim" qaǵıdasy qatań saqtalady. Iаǵnı, bastaýysh synyptar synyp jetekshisi ótetin pánderdi mektepte oqyp, qalǵanyn onlaın rejımde ótetin bolady", dedi Sapýra Týlekova.
Elordanyń barlyq mektepteri kezekshi synyptar úshin Densaýlyq saqtaý mınıstrligi bekitken qaýlyǵa sáıkes sanıtarlyq sharalardy qatań saqtaıdy. Dezınfeksııalyq týnnel, araqashyqtyq saqtaý úshin arnaıy belgiler, zalalsyzdandyrǵysh qurylǵylar ornatylady. Bul rette ata-analar da koronavırýs ınfeksııasyn juqtyrýdy boldyrmaý úshin barlyq qajetti sharalardy qamtamasyz etýi qajet. Betperde taǵý, qolǵap kııý, qoldy jeke antıseptık nemese bakterııaǵa qarsy dymqyl maılyqtarmen óńdeý qajet.
"Biz úshin balalar men ustazdardyń densaýlyǵy birinshi orynda, sol úshin sanıtarlyq sharalar qatań saqtalady. Ár synyptyń úzilis ýaqyttary da ártúrli. Árbir ekinshi sabaqtan keıin ylǵaldy jınaý, synyp bólmesin jeldetý júrgiziledi. Sabaq aıaqtalǵannan keıin synyp bólmesi kvarstalady. Mektep dezınfeksııalyq týnnelmen, kvarspen, teplovızormen, maskamen jáne dezınfeksııa quraldarymen tolyq qamtamasyz etildi", deıdi mektep-lıseı dırektory.
Aldaǵy oqý jyly qashyqtan oqytý formatynda bastalatyny belgili. Tek bastaýysh synyptar úshin ata-analardyń ótinishi negizinde "kezekshi synyptar" jumys isteıtin bolady. Qazirgi tańda elorda mektepteri kezekshi synyptar úshin ótinishter qabyldaýda. Qala boıynsha bastaýysh synyptarda 82 myńnan astam oqýshy bolsa, onyń 50%-y kezekshi synypta oqýǵa ótinish bildirgen. Kezekshi synypqa ótinish qabyldaý áli de jalǵasýda. Mektepterde bala sany 15-ten aspaıtyn kezekshi synyptar qurylady.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.
