О́kinishke qaraı, indet órship tursa da, halyq arasynda kezekke turýǵa, araqashyqtyq saqtaýǵa mán berip júrgender sırek. Taıaýda býy burqyraǵan kúlshe almaqshy bolyp, tandyr nan satatyn jerge barǵan edik. Aldynda bir top adam jınalyp qalypty. Alaıda araqashyqtyq saqtap, betperde kııý qajettigi báriniń esinen shyqqan syńaıly. Tandyr nan satatyn orynnyń aldynda úımelep tur. Kezekke turyp, ret-retimen alý eshkimniń oıyna kirip-shyǵar emes. Áıtpese tandyr nan bárine jetedi. Bul bir ǵana mysal. Kúndelikti ómirde mundaı jaǵdaıdyń talaıyn kórip júrmiz.
Qazir zaman burynǵydaı emes. Taýar da, azyq-túlik te jetkilikti. Keńes ókimeti tusyndaǵydaı sapaly taýarǵa uzyn-sonar kezekke turyp, kún uzaq kútýdiń qajeti joq. Aqshasyn shytyrlatyp sanap berseń, qalaǵan zatyńdy satyp alýyńa bolady. Tipti jetkizý qunyn tóleseń, esigińniń aldyna deıin ákep beretin qyzmet te bar. Desek te, kez kelgen jerge bara qalsań, úımelegen adam, kezekke talasqan halyq.
Kezek týraly áńgime aıtylǵanda Ulybrıtanııa eske túsedi. «Tumandy Albıonnyń» halqy neni bolsa da kún uzaq kútýden jalyqpaıdy. Tipti bul úlken mádenıetke aınalyp, aǵylshyndardyń shaıy, Bıg-beni men patshaıymy sekildi álemdik brend sanalady. Bir qyzyǵy, «Tumandy Albıonǵa» bara qalǵan kez kelgen týrıst te ony qatań saqtanady.
Aıtpaqshy, Ulybrıtanııa halqynyń kezekke turý mádenıeti ǵalymdardyń zertteý obektisine aınalǵaly qasha-a-an! Bul týraly kóptegen ǵylymı jumys jazyldy. Mamandar bul dástúrdiń qalyptasýy men shyǵý tegine úńilip kórdi. Sóıtse, aǵylshyndardyń kezekke turý, ony qatań saqtaý mádenıeti bertinde, dáliregi «О́ndiristik revolıýsııa» kezinde qalyptasqan eken.
О́tken ǵasyrdyń basynda Ulybrıtanııanyń áleýmettik jaǵdaıy turaqsyz, ekonomıka negizinen qara jumys kúshine táýeldi bolǵany belgili. «О́ndiristik revolıýsııanyń» bastalýymen búkil salada adamdy tehnıka almastyryp, shalǵaı eldi mekenniń turǵyndary qalalarǵa kóshken. Aǵylshyn qoǵamynda áleýmettik ózgeris bastalady. Taýar óndirýge tehnıka jumylǵannan keıin sórelerdegi sapaly taýar da artyp, olardy burynǵydaı lordtar men graftar ǵana emes, qarapaıym turǵyndar da satyp alýǵa múmkindik týady.
Sóıtip, aǵylshyndar dúkender men saýda ortalyqtaryna kezekke tura bastaıdy. Mundaıda halyq ta, bılik te kezektiń saqtalýyna erekshe mán beredi. Keıin zaman túzelgen soń da, olardyń bul úrdisi jalǵasa beredi. Osylaısha bul úlken bir mádenıetke aınalyp, álemge áıgili dástúr retinde qalyptasty. Búginde aǵylshyndar kezekke turýymen maqtanady. Muny Ulybrıtanııanyń joǵary oqý orynynda oqyp júrgende talaı márte kózben kórdik.
Kezekke turý – Keńes ókimeti tusynda da bolǵan. Dúkenge jańa taýar kelipti degendi estigen jurt kún uzaq kútýden sharshamaıtyn. Tipti qara nannyń ózin talon arqyly kezekpen alǵanyn ata-anamyz áli kúnge jyr qylyp aıtady. Iаǵnı kezekke turyp, ony saqtaý biz úshin de jat emes edi...
Táýelsizdik alǵaly kezekke turý kúsheıe tústi desek qatelespeımiz. Balany balabaqshaǵa berý, mektepke berý, dárigerge kóriný, bankomattan aqsha alý, turǵyn úı alý máselelerin, taǵy basqalardy kezekke turmaı sheshe almaımyz. Qysqasy, búkil salada kezekke turý máselesi bar.
Bir ókinishtisi, kezektiń saqtalýyna múddeliler az. Maqalamyzdyń basynda qarapaıym tandyr nanǵa kezektiń saqtalmaıtynyn aıttyq qoı. Mundaı ahýal basqa salalarda jeterlik. Balabaqsha kezegin, turǵyn úı kezegin ilgeri jyljytý úshin para usyný sekildi oqıǵalardy buqaralyq aqparat quraldarynan estip, bilip júrmiz. Pysyqaılar basqalardyń quqyǵyn aıaqqa taptaǵanyna qaramastan, múmkindiginshe tirligin tez bitirýge, óziniń arbasyn sýdan jyldam ótkizip alýǵa qumar.
Qoryta aıtqanda, joǵaryda aıtqan aǵylshyndar da, Keńes ókimetin kórgen bizdiń qoǵam da kezekke turýdyń beınetin bir adamdaı kórdi. Biraq «Tumandy Albıonda» kezekke turý mádenıeti saqtalsa, bizdiń elde «kezekti buzý mádenıeti» qalyptasyp barady...
