Sózimizge tuzdyq bolardaı, kúni keshe osyndaı ıgi jańalyqtyń shetin estip qýanyp qalǵan jaıymyz bar. Ol – Pavlodar oblysynda úsh birdeı aqynnyń kitaby jaryq kórýi edi. Dálirek aıtsaq, Aıbek Oralhannyń «Alty ańǵar» atty alǵashqy jyr jınaǵy men Alpysbaı Ábdilulynyń «Áripti sottaý» atty kitaptary Jazýshylar odaǵy Pavlodar oblystyq fılıalynyń arnaıy jobasy aıasynda jáne «Jomart júrek» syılyǵynyń ıegeri, óner janashyry Asylbek Týǵanbaıdyń qarjylaı qoldaý kórsetýimen jaryq kórgen.
«Búgingi jańalyq osy. Aıbek pen Alpysbaıdyń kópten kútken alǵashqy kitaptary jaryqqa shyqty. Kitaptardy shyǵarýǵa demeýshilik kórsetken Asylbek Týǵanbaı aǵamyzǵa alǵysymyz zor. Buıyrsa, Ertis-Baıan óńiriniń ádebı ómirinde taıaý kúnderi taǵy da birqatar aıtýly jańalyq bolatyndyǵyn súıinshileı ketkim keledi. Kerekýde kórkemsózdiń salqar kóshine ilesken talantty tustastarymyzdyń qatary kóbeıýde. Bul kóziqaraqty oqyrmandy erekshe qýantady. Olardyń aldy alǵashqy jınaqtaryn shyǵaryp ta úlgerdi. Osy bir úrdis úzdiksiz jalǵassa, óńirdiń ádebı ómiri jandana túseri sózsiz», deıdi aqyn, Jazýshylar odaǵy Pavlodar oblystyq fılıalynyń dırektory Jarqynbek Amantaı.
Al úshinshi kitaptyń ıesi – aıtysker aqyn, «Altyn dombyra» ıegeri Aspanbek Shuǵataev. Ol kitabyna «Jerdegi Aspan sóılese...» dep at qoıypty. Avtordyń aıtýynsha, kitapqa aıtystary men óleńderi engen.
