Elimizdiń memleket qaıratkeri Jaqsybek Qulekeev: "Sońǵy bir jyl ishinde Prezıdent Qasym-Jomart Toqaevtyń Joldaýynda aıtylǵan máselelerdi júzege asyrý maqsatynda elimizde qoǵamdyq baqylaý men azamattyq erkindikti kúsheıtýge, "Halyq únine qulaq asatyn memleket" tujyrymdamasyn iske asyrý aıasynda bıliktiń eseptiligin qamtamasyz etýge, qylmystyq zańnamany izgilendirýge, Parlamentte oppozısııanyń mindetti túrde bolýyn zańdastyrýǵa baǵyttalǵan kóptegen jumys atqaryldy. Bul Qazaqstan qoǵamyn odan ári demokratııalandyrýǵa baǵdar alǵanymyzdyń jarqyn kórinisi. Osylaısha, byltyrǵy Joldaýda aıtylǵan qoǵamdyq jańǵyrýǵa qatysty tarmaqtardyń barlyǵy tolyq iske asty", deıdi ol.
Sondaı-aq áleýmettik-ekonomıkalyq saladaǵy atqarylǵan ister az emestigin de qosa ketti.
"Koronavırýs pandemııasy Prezıdent Joldaýynda aıtylǵan ekonomıkalyq bastamalardy júzege asyrý barysyna birshama túzetýler engizdi. Sonyń nátıjesinde eldiń ekonomıkasy men halyqtyń áleýmettik jaǵdaıyn jaqsartýǵa baǵyttalǵan sharalar buryn-sońdy bolyp kórmegen aýqymdy sıpatqa ıe boldy. Aıtalyq, halyqty qoldaýǵa jáne bıznesti qorǵaýǵa baǵyttalǵan sharalar paketi bıyl 6 trln teńgeden asyp, IJО́-niń 8,7 paıyzyn qurady. Ol, birinshiden, densaýlyq saqtaý júıesiniń ınfraqurylymyn nyǵaıtýǵa, pandemııanyń taralýyna qarsy jumystarǵa tikeleı aralasqan medısına qyzmetkerlerin materıaldyq yntalandyrýǵa jumsaldy. Ekinshiden, bıznes sýbektileriniń, ásirese shaǵyn jáne orta bıznes nysandarynyń ekonomıkalyq belsendiligin qalpyna keltirýge, jumyssyzdar qatarynyń kóbeıip ketýine jol bermeýge, sonymen qatar tabys kózinen aırylǵan azamattardy áleýmettik qoldaýǵa baǵyttaldy. 11,5 myń shaǵyn jáne orta bıznes nysanyna jáne 1,6 mln adamǵa kredıttik «demalys» berildi. Bıznestiń salyq tólemderin tóleý merzimi shegerildi, 8 paıyzdyq jyldyq mólsherlememen nesıe alýǵa jaǵdaı jasaldy. 4 jarym mln-ǵa tarta adamǵa eki aı kóleminde áleýmettik tólemaqy berildi, 1 mln 600 myńǵa jýyq adamnyń kommýnaldyq shyǵyndary óteldi", deıdi Jaqsybek Qulekeev.
Jaqsybek Qulekeevtyń pikirinshe, sheteldik jáne otandyq jumysshylardyń áleýmettik jaǵdaıyn teńeltý úshin júıeli jumystar qolǵa alynǵan. Sheteldik jumys kúshin tartý prosesin baqylaý kúsheıtildi, jergilikti jáne sheteldik jumyskerlerdiń eńbek jáne áleýmettik qorǵalýyna qatysty aıyrmashylyqtardy joıýǵa kóńil bólindi. 2020 jyly sheteldik jumys kúshine kvota 40 paıyzǵa, ıaǵnı 49 myń adamnan 29 myńǵa azaıdy. Osy baǵyttaǵy jumystardyń nátıjesinde ár saladaǵy otandyq eńbekkerlerdiń tabysy kóterildi, eńbekaqy tóleý men áleýmettik qamsyzdandyrýǵa qatysty dıskrımınasııa bar ujymdardaǵy shıelenis deńgeıi tómendegenin tilge tıek etti.
"Jalpy alǵanda Prezıdenttiń ekonomıkalyq jáne áleýmettik baǵyttaǵy tapsyrmalary júzege asty deýge negiz bar", deıdi memleket qaıratkeri.
