Zańgerdiń aıtýynsha, qazir qoǵamda eki túrli kózqaras qalyptasqan: bir tarap taýlardy qazirgi tabıǵı qalpynda saqtaýdy qoldasa, ekinshi tarap týrıstik ınfraqurylymdy belsendi damytýdy usynady.
Tabıǵat janashyrlary Almaty taýlaryn shahardyń basty ereksheligi ekenin aıtady. Olardyń pikirinshe, adamdar arnaıy qymbat jabdyqsyz-aq jaıaý serýendep, treılrannıngpen nemese alpınızmmen aınalysa alady.
Almaty taý klasteriniń áleýeti joǵary: Halyqaralyq mamandar pikiri bir arnada toǵysty
Alaıda Erjan Esimhanov qazirgi tańda tanymal baǵyttarda kúrdeli máseleler kóbeıgenin atap ótti. Onyń sózinshe, Butaqty shatqaly, sarqyramalar men basqa da demalys oryndarynda retsiz avtoturaqtar, qoqys, ot jaǵý, shý jáne shamadan tys adam kóptigi baıqalady. Eger jaǵdaı ózgermese, mundaı oryndar qarapaıym týrıster úshin qolaısyz bola túsedi deıdi ol.
Sondaı-aq zańger sheteldik týrısterdiń áleýmettik jelilerde óńirdegi qoqys pen tártipsizdikti kórsetetin vıdeolar jarııalap júrgenin aıtyp, bul Almatynyń ımıdjine áser etetinin jetkizdi.
Osy rette ol Aýstrııa men Shotlandııa tájirıbesin keltirdi. Onyń aıtýynsha, bul elderde taýlar kópshilikke ashyq bolǵanymen, týrıstik baǵyttar júıeli uıymdastyrylǵan: arnaıy soqpaqtar, arqan joldary, demalys ınfraqurylymy jáne qaýipsizdik qyzmetteri bar.
Osyǵan baılanysty E. Esimhanov Almaty mańyndaǵy taýlardy júıeli túrde damytý qajet dep sanaıdy. Ol:
- jaıaý baǵyttardy retteýdi;
- turaqtar uıymdastyrýdy;
- qutqarý jáne tazalyq júıesin kúsheıtýdi;
- velosıped joldary men aspaly joldardy damytýdy usynady.
Sonymen qatar tabıǵatqa zııandy barynsha azaıtyp, ekologııany saqtaý mańyzdy ekenin atap ótti.
Zańgerdiń pikirinshe, másele jobalardyń ataýynda emes. Eń bastysy – taýly aımaqtardy retsiz emes, júıeli túrde damytý.
