Jıynda oblys ákiminiń orynbasary Batyrjan Baıjumanov óńirdegi aýrýhanalardyń COVID-19 ınfeksııasyn emdeýge qajetti qural-jabdyqtarmen qamtylýy, kadrlyq jasaqtalýy, dári-dármek qoryn qalyptastyrý, PSR-zerthanalardyń qyzmeti jóninde baıandady.
Onyń aıtýynsha, KVI men pnevmonııa kórsetkishi búgingi kúni edáýir tómendegen. Qazirgi kezde oblys kóleminde 42 adam KVI, al 401 adam pnevmonııadan em alýda. Búgingi kúni indetpen kúres sharalary úshin medısınalyq uıymdardyń materıaldyq-tehnıkalyq bazasyn nyǵaıtýǵa, ekinshi tolqynyna daıyndyq sharalary úshin oblystyq bıýdjetten 6,6 mlrd. teńge bólingen. Daıyndyq sharalarynyń ishinde kompıýterlik tomograf, pýlsoksımetr, vıbroakýstıkalyq apparat, rentgen apparaty, IVL, konsentrator sııaqty qural-jabdyqtar satyp alý josparda bar.
Sonymen qatar KVI-di emdeýge tartylǵan medısınalyq uıymdardyń janynan kıslorodtyq stansalar qoıylady. Jáne 140 jedel járdem avtokólikterin satyp alý josparlanyp otyr. Qazirgi kezde jumys istep turǵan 8 PSR zerthanasynda kúnine 1500 zertteý júrgizilse, aldaǵy ýaqytta bul kórsetkishti 3500-ge jetkizýge múmkindik bar. Sol sııaqty B. Baıjumanov oblysta 1 aıǵa jetetin dári-dármek qory bar ekenin aıtty. Oǵan qosa taǵy eki aılyq qor bolatyn dári-dármekke tapsyrys berilgen.
Oblys ákiminiń orynbasary Taldyqorǵanda jańadan salynyp jatqan ınfeksııalyq aýrýhananyń jabdyqtalýy, kadrlyq qamtylýy jaıly da aıtyp ótti. Atalǵan aýrýhanada 452 shtattyq birlik belgilense, sonyń biraz bóligi oblystaǵy medısınalyq uıymdardan, 143 medpersonal jumyspen qamtý ortalyqtary arqyly tartylatyn bolady. Sonymen birge elimizdegi medısınalyq joǵarǵy oqý oryndarymen de kelisimsharttar jasalyp, jas mamandar tartý kózdelip otyr.
Oblys ákimi Amandyq Batalov Taldyqorǵan kóp salaly aýrýhanasy men Almatydaǵy oblystyq kóp salaly klınıkalyq aýrýhananyń KVI emdeýde óńirdegi negizgi eki ortalyq bolatynyn basa aıtty. Sondyqtan osy eki aýrýhanada indetti emdeýge qajetti apparattardyń sanyn, qajettiligin túgendeýdi, jáne soǵan sáıkes satyp alynatyn apparattardyń túrleri men kólemin anyqtaýdy tapsyrdy.
– О́ńirdegi eki aýrýhana KVI-diń ekinshi tolqynyna tolyq daıyn bolýy úshin barlyq qajetti qural-jabdyqtary túgel bolýy tıis. Koronavırýs ınfeksııasy ásirese, sozylmaly aýrýlary bar syrqattarǵa aýyr tıetindikten bizde ınfeksıonıster ǵana emes, basqa da maman dárigerler em sharalaryna ázir turýy tıis. Ásirese, aýyr naýqastardy emdep, ólim-jitimdi boldyrmaýda munyń mańyzy zor. Sondyqtan qural-jabdyqtar boıynsha jasaǵan taldaý-esepterińdi qaıta qarap, tolyqtyryp, naqtylap kelýdi tapsyramyn. Jańa ınfeksııalyq aýrýhananyń qurylysy, oǵan qajetti qarjysy, jabdyqtalý máselesi tolyǵymen sheshilgen. Sondyqtan ol mekemede biz kadrlyq quram jasaqtaýǵa birden kirise berýimiz kerek. Infeksııamen kúreste negizgi kúsh osy aýrýhanaǵa túsedi. Sondyqtan onda myqty kásibı mamandar toptastyrylýy tıis. Syrttan tartylǵan mamandardyń áleýmettik jaǵdaıyn da nazardan tys qaldyrmaýymyz kerek, – dedi A. Batalov.
Sonymen qatar oblys basshysy ınfeksııalyq aýrýhananyń ishki bezendirilýi men syrtqy aýmaǵyn abattandyrý men kórkeıtý jumystaryna kirisýdi tapsyrdy.
