Syrtqy ister mınıstrliginiń resmı ókili Erlan Jetibaev el azamattarynyń qaýipsizdigin qamtamasyz etý úshin bar kúsh-jiger salynyp jatqanyn jáne kez kelgen jaǵdaıda jan-jaqty qoldaý kórsetýge daıyn ekenin aıtty. Qazirgi ýaqytqa deıin Qazaqstan Respýblıkasy azamattarynyń arasynda zardap shekkender nemese qaza bolǵandar týraly aqparat túsken joq.
«Qazaqstandyq dıplomattar Ortalyq apparatta da, óńir elderinde de táýlik boıy jumys isteýde. Memleket basshysynyń tapsyrmasy boıynsha otandastarǵa qajetti kómekti uıymdastyrý jónindegi barlyq jumysty jedel úılestiretin arnaıy shtab quryldy.
Azamattardan evakýasııalaý úderisin uıymdastyrýdyń kúrdeliligine túsinistikpen qarap, Qazaqstannyń sheteldegi mekemeleriniń qyzmetkerlerine barynsha qoldaý kórsetýdi suraımyz.
Evakýasııa jumystary kezinde zeınetkerlerge, ata-anasymen birge júrgen balalarǵa, júkti áıelderge, kámeletke tolmaǵandarǵa jáne densaýlyǵynda shekteýleri bar adamdarǵa basymdyq beriledi», dedi ol brıfıngte.
Resmı ókildiń málimetinshe, búgingi tańda Iranda – 47, Izraılde – 163, Qatarda – 3000-nan astam, Birikken Arab Ámirlikterinde – 4000-nan astam, Saýd Arabııasy Koroldiginde shamamen 1800 Qazaqstan azamaty bar.
Atalǵan elderdegi azamattarmen turaqty túrde baılanys bar jaǵdaıdyń damýyna qaraı qajetti usynymdar berilýde.
Mınıstrlik ýákiletti organdarmen birlese azamattarymyz úshin evakýasııalyq reısterdi pysyqtady. Búgingi kúnge deıin shıelenis aımaqtarynan 946 azamat shyǵaryldy.
«Jaqyn arada Maskat qalasynan Almatyǵa 314 azamat bar reıs keledi. Keıin dál osy baǵyt boıynsha shamamen 230 qazaqstandyqty qamtıtyn ekinshi toptyń ushýy josparlanǵan. Osylaısha, Omannan elge 500-den astam Qazaqstan azamaty oralady dep kútiledi. Sonymen qatar búgin Djıdda – Atyraý jáne Djıdda – Aqtaý baǵyttary boıynsha evakýasııalyq reıster josparlanǵan, olarmen 326 azamat elge qaıtarylady», deıdi Erlan Jetibaev.
Áýe reısterinen bólek, qazaqstandyqtardy shyǵarý jerústi joldary arqyly da júzege asyrylýda. Atap aıtqanda, Tegeran, Ashhabad jáne Gorgan qalalaryndaǵy sheteldik mekemeler 15 azamattyń Iran-Túrikmenstan shekarasy arqyly ótýin qamtamasyz etti. Odan ári olarǵa Aqtaýǵa jetý úshin qajetti kómek kórsetildi.
Sonymen birge Tegeran men Erevandaǵy dıplomattar «Zarkýh» kompanııasynyń qalǵan 35 qyzmetkeriniń Irannan shyǵýyn uıymdastyrdy. Olar avtobýspen Iran-Armenııa shekarasyn kesip ótti.
«Áýe keńistigine qoıylǵan eleýli shekteýlerge baılanysty belsendi áskerı is-qımyldar toqtap, jaǵdaı tolyq qalypqa kelgenge deıin Taıaý Shyǵys óńir elderine saparlardan bas tartýǵa qatań túrde keńes beremiz.
О́ńirde júrgen Qazaqstan azamattaryn jeke qaýipsizdik sharalaryn kúsheıtýge, qaýipti aýdandarǵa barmaýǵa, jergilikti bılik organdarynyń nusqaýlary men usynymdaryn oryndaýǵa, sondaı-aq Qazaqstannyń elshilikteri men konsýldyqtarymen, týroperatorlarmen jáne áýe tasymaldaýshylarymen baılanysta bolýǵa taǵy da shaqyramyz», deıdi ókil.
Onyń aıtýynsha, azamattarymyzdyń qaýipsiz túrde elge oralý máselesi memleket úshin basymdyq bolyp qala beredi.
Eske sala keteıik, Izraıl 28 aqpan, senbi kúni tańerteń Iranǵa soqqy jasady. Dýbaı, Abý-Dabı jáne Ras-el-Haımada júrgen Qazaqstan azamattary reısterdiń toqtatylýyna baılanysty elge qaıta almaı otyr. Al «Qazposhta» Taıaý Shyǵystaǵy jaǵdaıdyń shıelenisýine baılanysty halyqaralyq poshta jóneltilimderine ýaqytsha shekteýler qoıylǵanyn málimdedi.
