Aımaqta búginde 35-ke jýyq etnos ókilderinen quralǵan 809 myńnan astam azamat berekeli birlik pen tatý-tátti ómir súrýde. Oblystyq Assambleıada 11 etnomádenı, aýdandarda 6 etno baǵyttaǵy úkimettik emes uıymdar, 118 analar keńesi, 165 qoǵamdyq kelisim keńesi jumys júrgizedi. Sonymen birge ǵylymı-sarapshylyq top, medıasııa kabıneti, "Qazaqstan halqy Assambleıasy" kafedrasy, depýtattyq jáne kásipkerler toby, jýrnalıster men sarapshylar klýby, "Jańǵyrý joly" jastar qozǵalysy, qaıyrymdylyq baǵytynda úılestirýshilik jáne qoldaý kórsetý men volonterlik ortalyqtary júıeli jumys júrgizýde.
Jyl basynda bastalǵan pandemııa kezinde Assambleıanyń bastamasymen 5 myńǵa jýyq medısınalyq maska taratylyp, oblystyq juqpaly aýrýlar aýrýhanasyna járdem jasaldy. Sonymen qatar, "Myń alǵys!" jalpyulttyq aksııasy aıasynda 2 myń medısına qyzmetkerine 12 mıllıon teńgeniń kómegi kórsetildi. Jyl basynan beri 20 myńǵa jýyq adamǵa 130 mıllıon teńge kóleminde járdem berilgen.
Búginde barshamyzdyń basty maqsatymyz – elimizde qoǵamdyq kelisim men turaqtylyqty saqtap, etnosaralyq tatýlyqty qamtamasyz etý. Tolymdy jetistikterimizdi eselep, áleýmettiń áleýetin kóterýimiz qajet. Osy mindetterdi oryndaýda oblystyq Assambleıa qyzmetin jańa deńgeıge kóteredi dep oılaımyn. Sizder, Qazaqstan halqy Assambleıasynyń róli men mártebesin arttyrý boıynsha júıeli jumys júrgizetindikterińizge senimdimin. Oblystyq Qazaqstan halqy Assambleıasynyń barlyq múshelerine, etnomádenı birlestikterge barlyq bastamalaryńyzǵa sáttilik, densaýlyq pen amandyq tileımin, - dedi oblys ákimi G.Ábdiqalyqova.
Merekelik sharada sóz alǵan "Slavıane" qoǵamdyq-mádenı ortalyǵy» oblystyq qoǵamdyq birlestiginiń tóraıymy Galına Sherbakova Syr óńirindegi ulttar men ulystardyń tatýlyǵy týraly oıyn ortaǵa saldy. Al "Qazaqstan koreıler qaýymdastyǵy" oblystyq qoǵamdyq birlestiginiń tóraıymy Elena Kım Koreı etnomádenı birlestiginiń 30 jyldyǵyna baılanysty usynysyn jetkizse, oblystyq ózbek etnomádenı birlestiginiń tóraǵasy Qahar Dadashev aımaqtaǵy kásipkerlik salasy, qaıyrymdylyq baǵytyndaǵy Assambleıanyń rólin arttyrý baǵytyndaǵy josparlarymen bólisti.
Jıyn sońynda aımaq basshysy Gúlshara Ábdiqalyqova jasampazdyqqa, izgilikke toly 25 jyl ishinde qoǵamdyq kelisim men turaqtylyqty saqtaýǵa qosqan eleýli úlesteri úshin oblystyq etnomádenı birlestik jáne qurylym jetekshilerine "Qazaqstan halqy Assambleıasyna 25 jyl" merekelik medalin tabystady.
