Alaıda ótken aptanyń tórt kúni jaýyn-shashyndy bolyp, kóptegen egis alqabynyń jumysyna kedergi keltirdi. Áıteýir kúnniń ystyǵy jerdiń tez kebýine múmkindik berip tur. Al osy aptanyń dúısenbisinde jarqyrap kún ashyldy. Aýanyń temperatýrasy keı jerlerde 31 gradýs ystyqqa jetip tur dep habarlady gıdromet ortalyǵy.
Budan buryn habarlaǵanymyzdaı, Esil óńiriniń astyqty alqaptarynda búgingi tańda 7,5 myń dala kemesi júıtkip júr. Olarǵa bıyl 75 myń tonna arzandatylǵan dızel otyn jetkizilgen. Búgingi tańda jalpy astyq kóleminiń 31,8 paıyzy bastyryldy. Bul – 950 myń gektar degen sóz. Ázirge oblys dıqandary 1 mln 330 myń tonna astyq jınady. Bul belgilengen mejeniń tórtten biri ǵana. Barlyq astyq alqaby – 4,2 mln gektar. Sonymen birge oblys bıyl 922 myń gektar alqapqa maıly daqyldar ekken bolatyn. Gektar berekesi ortasha alǵanda astyqty alqaptardan 14 sentnerden, maıly daqyldardan 9 sentnerden aınalýda. Oblystyq aýyl sharýshylyǵy jáne jer qatynastary basqarmasynyń bastyǵy Erbolat Bekshenovtiń aıtýyna qaraǵanda, gektardyń ortasha berekesi jaqyn kúnderi kóterilýi tıisti. О́ıtkeni astyǵy shyǵymdy óńirlerge áli oraq jete qoıǵan joq. Sonymen birge ol belgilengen mejeniń oryndalatynyna da senim bildirdi. Tek kún raıy erte buzylmasa bolǵany.
Syıymdylyǵy 7 mln tonnadaı astyq qabyldaý oryndary oraqqa deıin astyq qabyldaýǵa daıyn bolǵan. Qazir olardyń aýmaqtarynda jumys qyzý júrip, qoımalaryna alǵashqy astyq quıylýda.
Aıta ketetin jaıt, bıyl qyzyljarlyq dıqandar barlyq agrotehnıkalyq sharalardy ýaqtyly jasaǵan bolatyn. Sonyń ishinde jerge 100 myń tonna mıneraldy tyńaıtqysh sińirildi. Endi tek astyqty tókpeı-shashpaı jınap alý mindeti árbir dıqannyń aldynda tur.
Gıdrometeoortalyqtyń boljaýyna qaraǵanda, osy aptanyń sońyna qaraı kún raıy buzylady. Kelesi aptada tolyqtaı jańbyr jaýmaq. Sondyqtan dıqandar árbir sátti utymdy paıdalanyp qalýǵa tyrysýda.
Soltústik Qazaqstan oblysy
