Prezıdent Qasym-Jomart Toqaev "Jańa jaǵdaıdaǵy Qazaqstan: is-qımyl kezeńi" Joldaýynda sıfrlyq teńsizdikti joıý, ınternetke barynsha qol jetkizýdi jáne barlyq azamattardy sapaly baılanyspen qamtamasyz etý qajettigine erekshe nazar aýdardy.
B. Mýsın búgingi tańda qazaqstandyqtardy sapaly ınternetpen qamtamasyz etý boıynsha eki joba iske asyrylyp jatqanyn atap ótti, olar: aýyldyq eldi mekenderde talshyqty-optıkalyq baılanys jelilerin salý jáne ınternetke mobıldi keńjolaqty qosylý, olar osy jyldyń sońyna deıin aıaqtalady. Bul 250-den astam turǵyny bar barlyq aýyldardy sapaly ınternetpen qamtamasyz etedi. Sondaı-aq baılanys sapasyn arttyrý úshin mynadaı sharalar qabyldanady:
baılanys sapasynyń parametrleri aıqyndalady;
ınternet sapasy boıynsha derekterdi tirkeýge jáne berýge múmkindik beretin Halyqtyq baqylaý quraly engiziledi;
baılanys operatorlaryna qoıylatyn talaptardy arttyrý boıynsha birqatar basqa da zańnamalyq túzetýler pysyqtalady.
Sonymen qatar Memleket basshysy óziniń jyl saıynǵy joldaýynda jyl sońyna deıin asa suranysqa ıe anyqtamalar men qaǵaz rastaýlardy alyp tastaýdy, aqparatty sıfrlyq rastaýdy qamtamasyz etýdi tapsyrdy. Halyqtyń elektrondyq servıstermen ózara is-qımylyn jeńildetý úshin memlekettik qyzmetter deńgeıinde jáne jeke bızneste bıometrııany keńinen qoldaný qajet ekendigi atap ótildi. B. Mýsınniń aıtýynsha, QR SDIAО́M qyzmet alýshylardyń Egov-ta bir qadam arqyly tirkelýin júzege asyrýda. Bul qoldanýshylarǵa bıometrııalyq sáıkestendirýden ótip, kez-kelgen qyzmetke qol qoıýǵa múmkindik beredi.
"Sonyń nátıjesinde, kóptegen adamdar Egov qyzmetterin paıdalana alatyn bolady. Onlaın-kommersııalyq qyzmetterdi damytý úshin bızneske de senimdi bıometrııalyq qural usynylady. Azamat paıdalanýshy bolǵannan keıin sıfrlyq qujat qyzmetin qaǵaz qujattarmen teń qoldana alady", — dedi mınıstrdiń m. a. Jyl sońyna deıin júrgizýshi kýáligin, kóliktiń tehnıkalyq tólqujatyn, azamattyń tólqujatyn, joǵary bilim týraly dıplomdy, stýdenttik bıletti, saqtandyrý polısin shyǵarý josparlanýda.
Sondaı-aq jyl sońyna deıin 30-ǵa jýyq suranysqa ıe anyqtama alyp tastalady. Shynaıylyqty rastaý QR kodty oqý arqyly qamtamasyz etiletin bolady. B. Mýsın Q. Toqaevtyń aıtýynsha, jańa deńgeıge shyǵýy tıis "derektermen" júrgizilip jatqan jumys týraly tolyǵyraq aıtyp berdi.
"Biz bir jyl ishinde etalondyq derekterdiń biryńǵaı arhıtektýrasyn ázirleımiz. Smart Data Ukimet memlekettik organdardyń vedomstvoaralyq taldaý júıesi retinde jetildiriledi. Aqaýǵa tózimdilikti qamtamasyz etý úshin biz "Ulttyq aqparattyq tehnologııalar" aksıonerlik qoǵamy tulǵasyndaǵy derekter operatorynyń ınfraqurylymynda aqparattyq júıelerdi shoǵyrlandyrýdy jalǵastyramyz. Atalǵan maqsattar úshin memlekettik data ortalyqty damytý usynylady", — dedi B. Mýsın.
QR SDIAО́M taldaýy kórsetkendeı, otandyq AT-ónimder memlekettik jáne kvazımemlekettik satyp alýlardaǵy halyqaralyq analogtardy jylyna 56 mlrd teńgege almastyra alady. Ol úshin senimdi otandyq baǵdarlamalar tiziliminiń tetigi bar. Bul tizimnen satyp alý basym tártippen júrgizilýi tıis. Al basqa jekemenshik naryqtarda otandyq AT-ónimderdiń áleýeti 142 mlrd teńgeni quraıdy.
"Osy sandarǵa qol jetkizý úshın bizge offteık kontrakttar, nesıeler alýǵa kredıttik garantııalar jáne taǵy basqa qural túrlerin damytý qajet. Atalǵan nátıjelerge qol jetkizgen soń sheteldik naryqqa da shyǵýǵa umtylatyn bolamyz", — dedi B. Mýsın.
Qasym-Jomart Toqaev Joldaýda bes jyl ishinde maınıng ındýstrııasy men data-ortalyqtarǵa salynatyn ınvestısııa kólemin 500 mlrd teńgege deıin jetkizý kerektigin atap ótti. Búgingi tańda Qazaqstanda 13 maınıng fermasy jumys isteıdi (620 MVt tutynatyn).
Sondaı-aq 4 ferma (450 MVt jýyq) salynyp jatyr. Bul salaǵa 80 mlrd astam teńge ınvestısııa tartylǵan. Qazirgi tańda taǵy da 300 mlrd teńgege ınvestısııa tartý boıynsha aldyn ala kelisimder bar. Al 2025 jylǵa qaraı ınvestısııa kólemi shamamen 500 mlrd teńgeni quraýy josparlanýda. QR SDIAО́M osy baǵyttaǵy jumystardy qarqyndy ary qaraı jalǵastyrýdy kózdep otyr.
