Jol júrý qujattaryn (bıletterdi) jáne aqshalaı qarajattaryn qaıtarý úshin "Jolaýshylar tasymaly" AQ jolaýshylardan kelip túsken ótinishterdi qabyldap jáne máseleni jedel sheshý maqsatynda 2020 jyldyń 3 qyrkúıeginen bastap WhatsApp +7-707-270-36-64 messendjerin iske qosty.
Bıletter úshin tólemderdi qaıtarý tártibi men bıletti satyp alý tásiline baılanysty qolma-qol aqshamen jáne qolma-qol aqshasyz esep aıyrysý arqyly júrgiziledi:
Stansadan poıyz jóneltilgenge deıin 1 saǵattan keshiktirmeı bıletti qaıtarǵan shaqta ǵana aqsha qarajaty 5 (bes) jumys kúni ishinde tóleýshiniń kartasyna túsedi;
Stansadan poıyz jóneltilgenge deıin 1 saǵattan kem ýaqyt aralyǵynda bıletti qaıtarǵan kezde aqsha qarajaty jolaýshynyń ótinishi negizinde talap qoıý tártibimen 30 (otyz) kúntizbelik kún ishinde jolaýshynyń kartasyna túsedi.
"Bılet qunyn qaıtara almaǵan jolaýshylar WhatsApp +7-707-270-36-64 nómirine habarlasyp, aqsha qaıtarý mártebesin surastyrýlaryna bolady. Suraý salýdy jibergen kezde jol júrý qujatynyń (bılettiń) nómirin kórsetý kerek nemese bılet kassasyna júgingen kezde jol júrý qujatynyń (bılettiń) fotosýretin jáne jol júrý qujatyn (bıletin) qaıtarý týraly túbirtekti jiberý qajet", - delingen habarlamada.
Ulttyq tasymaldaýshy temir jol bıletterin qaıtarý úshin Qazaqstan Respýblıkasy Indýstrııa jáne ınfraqurylymdyq damý mınıstriniń 2015 jylǵy 30 sáýirdegi № 545 buıryǵymen bekitilgen Jolaýshylardy, bagajdy, júk-bagajdy jáne poshta jóneltilimderin temirjol kóligimen tasymaldaý qaǵıdalaryna (budan ári-qaǵıdalar) sáıkes júrgiziletinin eske salady.
Erejege sáıkes jol júrý qujattaryn (bıletterdi) qaıtarý kezinde:
- poıyz jóneltilgenge deıin 24 saǵattan keshiktirmeı - jol júrý qujatynyń tolyq quny qaıtarylady;
- keminde 24 (jıyrma tórt) saǵat buryn, biraq poıyz jóneltilgenge deıin keminde 6 saǵat buryn – bılet quny jáne plaskart qunynyń 50% qaıtarylady;
- poıyz jóneltilgenge deıin keminde 6 saǵat buryn jáne jóneltilgennen keıin 1 saǵattan artyq emes – bılettiń quny qaıtarylady, bul rette plaskarttyń tolyq quny ustalady.
Poıyz jóneltilgennen keıin 1 saǵattan soń jol júrý qujattaryn (bıletterin) qaıtarý júrgizilmeıdi jáne aqsha qarajaty qaıtarylmaıdy.
Jolaýshylar poıyzynyń qatynaýy toqtaǵan jaǵdaıda jolaýshylar jol júrý qujattaryn (bıletterin) qaıtarýdy resimdep, aqshalaı qarajattaryn tolyq kólemde qaıtaryp ala alady.
Esterińizge sala keteıik, jolaýshylar jol júrý qujattaryn (bıletterdi) satyp alǵan orny boıynsha qaıtarý kerek.
