El Prezıdenti Q.Toqaevtyń jańa Joldaýynda sıfrlandyrýdyń sán úrdisiniń jalǵasy emes, ulttyq básekege qabilettilikke qol jetkizýdiń negizgi quraly ekendigi atalǵan bolatyn. Jańa oqý jylynyń bastalýyna arnalǵan merekede sıfrly pedagogıkanyń jańa zerthanasynyń ashylýy sımvoldyq mánge ıe.
– Búginde adamzat jahandyq aqparattyq-sıfrly qoǵamdy qurýǵa baılanysty óz damýynyń sapaly jańa kezeńine qadam basyp otyr jáne osy ýaqyt talaby «Sıfrly Qazaqstan» memlekettik baǵdarlamasynda qamtylǵan. Biz baǵdarlamalardy iske asyrý IT-quzyrettilikterge ıe kásibı kadrlardy qajet etetinin túsinemiz. Jańa tehnologııalar dástúrli oqytý júıesin de, bilim berý ortasyn da ózgertýde. Pedagogıkada jaqynda «digital pedagogy» («sıfrly pedagogıka») termıni paıda boldy jáne bul uǵym «onlaın oqytý» degen sóz tirkesimen sınonım emes. Sıfrly pedagogıka – ártúrli sıfrly tehnologııalardy (kompıýterler, gadjetter, baǵdarlamalyq qamtamasyz etý jáne t.b.) qamtıtyn jáne osynyń nátıjesinde bilim berý qyzmetteriniń neǵurlym joǵary sapasyn qamtamasyz etetin pedagogıkalyq prosess. IT-tehnologııalardy damytý salasy oqý ornymyzdyń damý tujyrymdamasynda da basym baǵyt sanalady. S.Amanjolov atyndaǵy Shyǵys Qazaqstan ýnıversıtetinde osy baǵytqa kóp kóńil bólinedi, zamanaýı sıfrly jabdyqtarmen jaraqtalǵan jańa zerthanalar men oqý aýdıtorııalary ashylýda. Munyń bári bizdiń stýdentterge jaqsy bilim alýǵa jáne eńbek naryǵynda básekege qabiletti bolýǵa múmkindik beredi. Al ýnıversıtette jańa úlgidegi bilim berý tehnologııalary boıynsha kadrlar daıarlaýǵa múmkindik beretin taǵy bir qurylym – sıfrly pedagogıka zerthanasy ashylyp otyr, – dedi S.Amanjolov atyndaǵy Shyǵys Qazaqstan ýnıversıtetiniń rektory, professor Muhtar Tólegen.
Zerthanany qurýdaǵy maqsat – qazirgi zamanǵy IT-quzyrettilikterge ıe zamanaýı bilim berý júıesi úshin pedagogıkalyq kadrlardy daıarlaý, qazirgi zamanǵy AKT (aqparattyq-kommýnıkasııalyq tehnologııalar) quraldaryn tıimdi qoldaný jaǵdaıynda zamanaýı oqý prosesin pedagogıkalyq jobalaýdyń ǵylymı-ádistemelik negizderin ázirleý, oqytýdyń qosymsha nysandaryn iske asyrýdyń jáne mektep pen kolledj pedagogterine bilim berý qyzmetterin kórsetýdiń tıimdi tetigin qamtamasyz etý.
Sıfrly pedagogıka zerthanasynda oqytý sıfrly bilim berý resýrstary, bilim berýdegi qashyqtan oqytý tehnologııalary, onlaın-oqytý, sıfrly bilim berý ortasy, kompıýterlik tehnologııalar jáne t.b. baǵyttar boıynsha júrgiziletin bolady.
– Biz mektepterdegi áriptesterimizge jáne mektep túlekterine, mysaly, UBT-ǵa daıyndyqty, al pedagogterge jumysqa arnalǵan elektrondy resýrstar men jańa IT-platformalardy, sondaı-aq resýrstardyń ádistemelik jıyntyǵyn usynamyz: Bilim jáne ǵylym mınıstrligi ádistemelik usynymdaryn eskere otyryp daıyndalǵan beınedárister, beınekonsýltasııalar bar. Qazirgi ýaqytta ýnıversıtet mamandary túrli taqyryp boıynsha kóptegen beınematerıal, jekelegen oqý pánderi boıynsha muǵalimderge arnalǵan Sıfrly pedagogıka zerthanasynda ýnıversıtettiń elektrondy kitaphanasynyń ádebıetterin jeke saıtpen jáne elektrondy resýrstarmen, elektrondy kitaptarmen, aýdıo jazbalarmen jáne mýltımedıalyq oqýlyqtardyń platformalarymen paıdalaný arqyly ártúrli vebınarlardy onlaın rejimde júktep otyr, – deıdi pedagogıkalyq bilim berý jáne menedjment kafedrasynyń meńgerýshisi Natalıa Radchenko.
Úkimet basshysy Bilim jáne ǵylym mınıstrligine Sıfrlyq damý, ınnovasııalar jáne aeroǵarysh ónerkásibi mınıstrligimen jáne ákimdiktermen birlesip, elde «Sıfrly bilim berý» baǵdarlamasyn aýqymdy iske qosýdy qamtamasyz etýdi tapsyrǵany belgili.
– «Daıyn UBT» trenajeri talapkerge sapaly qurastyrylǵan test suraqtarynan ótýge, oblysta óz deńgeıin, tańdaǵan pánderin bilýge múmkindik beredi. Sonymen qatar trenajer kelesi ótý kezinde test suraqtaryn qıyndata alady, – deıdi marketıng, mansap jáne jumyspen qamtý ortalyǵynyń basshysy Jannel Bolatova.
Oqý ornynyń rektory M.Tólegenniń aıtýynsha, Shyǵys Qazaqstan ýnıversıteti úı sharýasyndaǵy áıelderden bastap joǵary oqý oryndarynyń oqytýshylaryna deıingi azamattardyń barlyq sanattary úshin kýrstyq daıyndyqtardy júrgize otyryp, bolashaqqa esik ashyp, alǵa qadam basýda.
О́SKEMEN
