Nursultan Nazarbaev atyndaǵy halyqaralyq áýejaıda sanıtarlyq sharalar kúsheıtildi. Profılaktıkalyq jumystar kún saıyn júrgiziledi. Ár úsh saǵat saıyn áýejaı aýmaǵy, qyzmettik úı-jaılar, arnaıy quraldar, sondaı-aq adamdar kóp shoǵyrlanǵan jerlerde dezınfeksııa jasalady.
"Biz termınaldardyń barlyq kireberis toptaryna 15 termokamera ornattyq, jeke qorǵanys quraldary, maskalar, qolǵaptar satyp aldyq. Antıseptıkter áýejaıdyń barlyq termınalynda jáne ákimshilik ǵımaratynda bar. Jolaýshylar jınalatyn jerlerde araqashyqtyq saqtaý belgileri, oryndyqtarǵa lentalar japsyryldy", - dedi "Nursultan Nazarbaev halyqaralyq áýejaıy" AQ basqarma tóraǵasynyń orynbasary Arnabol Baqyt.
Barlyq áýejaı qyzmetkerleri jeke qorǵanys quraldarymen qamtamasyz etilgen. Ol úshin 14 myń jeke qorǵanys quraldary, 122 myń medısınalyq qolǵap, 400 myńnan astam maska satyp alyndy. Qyzmetkerlerdi aýysym aldyndaǵy jáne aýysymnan keıingi medısınalyq tekserýler kún saıyn júzege asyrylady. Eger olardan joǵary temperatýra nemese basqa belgiler baıqalsa, olar jumysqa shyǵarylmaıdy.
Qazirgi ýaqytta áýejaı ishki jáne birqatar halyqaralyq reısterdi qabyldaıdy. Kompanııa jolaýshylarǵa sanıtarlyq normalardy qatań saqtaý, maska taǵý, sanıtaızer qoldaný jáne araqashyqtyq saqtaý kerektigin eskertedi.
