Igorǵa kópten kútken qýanyshty kún týdy. Keshe ǵana ol shartty túrde merziminen buryn bosatý arqyly Aqtaýdaǵy kolonııadan bostandyqqa shyqty.
– Jazamdy óteý kezinde Qylmystyq atqarý júıesiniń tórt mekemesinde boldym, qazir sonyń úsheýi jabylǵan. Men qamaýdaǵy kezimdi bosqa ótkizgen joqpyn. Transporttyq-tehnologııalyq kólik jáne keshenderdi paıdalaný salasynda arnaýly orta bilim dıplomyna qol jetkizdim, – deıdi Igor.
Igor ózine úkim oqylǵan kezdi, sol sáttegi kóńil kúıin umytqan jáne ol týraly esine de alǵysy kelmeıdi. Qazir ol tek qapastan bosaǵan sátiniń qýanyshyn ǵana oılap, áserin taýysa alar emes. Jasy 50-ge kelse de ózi úshin naǵyz ómir endi bastalǵandaı. Sottalardan 5 jyl buryn otbasynan ajyrasqan Igorǵa mekeme ákimshiligi qyzmetkerleri qoldaý kórsetip, 2012 jyly onyń balalarymen baılanysyn jolǵa qoıýǵa qol jetkizdi. Alaıda, ol bostandyqta týǵan qalasy Aqtóbeni emes, Aqtaýdy tańdady. Teńiz jaǵasyndaǵy kórikti qalada qalyp, erkin ómirge aralasýdy jón dep tapqan. Oǵan múmkindik te bar, óıtkeni mekeme ákimshiligi Igorǵa jumys jáne baspana máselesin sheshýge kómek berýde. Jyldar boıy túrmede otyrǵan adamnyń azat ómirge beıimdelip, qoǵamǵa sińisip ketýi úshin Qylmystyq-atqarý júıesi Mańǵystaý oblysy boıynsha departamenti jan-jaqty qoldaý kórsetiledi dep otyr.
– Qamaýdan bosatylǵan azamat Aqtaýda qalatyndyǵyn aıtqanda biz jumys jáne baspana máselesin sheshýge kiristik. Dereý jergilikti atqarý organdarymen habarlastyq. Sondaı-aq, bostandyqqa shyǵýy úshin Igorǵa qajetti qujattardy daıyndadyq. Biz uzaq ýaqyt qamaýda bolyp, qoǵamnan oqshaýlanǵan bul azamattyń budan ári bostandyqta qylmysty qaıtalamaı, qatelikke urynbaı ómir súrýine múmkindik beremiz. Shartty túrde merziminen buryn bosýshylardy qadaǵalaý bizdiń vedomtsvonyń quzyryna jatpasa da, burynǵy óz qamqorlyǵymyzdaǵy jandy qoldaýsyz qaldyrmaımyz, deıdi Qylmystyq-atqarý júıesi Mańǵystaý oblysy boıynsha departamenti bastyǵynyń orynbasary Qanat Jarylǵapov.
Bosaǵan kúni-aq QAJD qyzmetkerleri Igordy Aqtaý qalasyna serýenge shyǵaryp, teńiz jaǵalaýyna qydyrtty.
– Bári óte qatty ózgergen. Munda, tipti, aýa da basqa, sondyqtan maǵan jańa ómirge beıimdelý qajettigi ańǵarylyp tur. Jan-jaǵyma qarasam tańǵalarlyq nárseler kóp-aq. Bir qyzyǵy, adamdardyń barlyǵy tek telefonǵa úńilip otyr, kúnde kórip júrgendikten olar úshin qorshaǵan ortasy tańǵalarlyq emes, deıdi jan-jaǵyna qýana ári tańdana qaraǵan Igor.
