Foto: Qyzylorda oblysy ákimdigi
Alem Qurylys AQ kompanııasy qurylysyn júzege asyrǵan baq eki qabatty zamanaýı ǵımaratta ornalasqan. Keshen ishinde Ońtústik Amerıka, Afrıka, Qytaı, Meksıka, Japonııa, Madagaskar, Aýstralııa jáne basqa da óńirlerdiń ósimdikterine arnalǵan taqyryptyq ekspozısııalar jasaqtalǵan.
Ǵımarattyń birinshi qabatynda keń vestıbıýl, qabyldaý aımaǵy, saýda pavılondary men qyzmettik bólmeler ornalasqan. Keshenniń negizgi bóligin jalpy aýmaǵy 1,5 myń sharshy metrden asatyn eki iri jylyjaı quraıdy. Onda álemniń túrli klımattyq beldeýlerinen ákelingen ekzotıkalyq ósimdikter ósiriledi.
Tropıkalyq jylyjaıda aýa ylǵaldylyǵyn tabıǵı deńgeıde ustap turatyn tuman qalyptastyrý júıesi jumys isteıdi. Sondaı-aq artyq ylǵaldy buryp áketetin drenaj júıesi qarastyrylǵan.
Budan bólek botanıkalyq baqta bilim berý is-sharalaryn ótkizýge arnalǵan 40 oryndyq dáris zaly da bar. Ekinshi qabatta ákimshilik kabınetter, demalys aımaǵy, ashana jáne jylyjaılarǵa panoramalyq kórinis ashylatyn sholý kópiri ornalasqan.
Eske sala keteıik, buǵan deıin Syr elinde alǵash bolyp óndiristik baǵytta qarasora ósiriletinin jazǵan edik.
